काठमाडौं। भूमि व्यवस्था, सहकारी तथा गरिबी निवारण मन्त्री प्रतिभा रावलले सहकारी पीडितसँग प्रत्यक्ष संवाद सुरु गरेकी छन् ।
सरकारले सय दिनभित्र साना सहकारी बचतकर्ताहरूको रकम फिर्ता गराउने लक्ष्य अघि सारेको सन्दर्भमा मन्त्री रावलले पीडितहरूसँग छलफल थालेकी हुन्। आज बिहानैदेखि मन्त्रालयमा देशभरका विभिन्न सहकारीबाट प्रभावित बचतकर्ताहरू भेला भई आफ्ना समस्या र गुनासा प्रत्यक्ष रूपमा प्रस्तुत गरेका छन्।
लामो समयदेखि बचत फिर्ता नपाउँदा आर्थिक तथा मानसिक रूपमा प्रभावित सर्वसाधारणले आफ्नो वास्तविक अवस्था सुनाउने अवसर पाएका छन्। छलफलका क्रममा मन्त्री रावलले सहकारी पीडितहरूको समस्या समाधानलाई मन्त्रालयले उच्च प्राथमिकतामा राखेको स्पष्ट पारेकी छन्।
“पीडितहरूको सम्बोधन कसरी प्रभावकारी रूपमा गर्ने भन्ने विषयमा मन्त्रालय गम्भीर छ,” मन्त्री रावलले भनिन्।
उनले सहकारी क्षेत्रमा देखिएका समस्याको समाधानका लागि सरकारले चरणबद्ध रूपमा काम अघि बढाइरहेको र विशेषगरी साना बचतकर्तालाई राहत दिने योजनामा केन्द्रित रहेको बताइन्।
मन्त्रालयले सुरु गरेको यस प्रकारको प्रत्यक्ष संवादले सहकारी पीडितहरूको समस्या समाधानतर्फ ठोस पहल हुने अपेक्षा गरिएको छ।
