काठमाडौँ । नेपाली काँग्रेस भित्रको आन्तरिक विवाद अझै साम्य हुन नसकिरहेका बेला संस्थापनइतर पक्षले १४औँ महाधिवेशनबाट निर्वाचित केन्द्रीय कार्यसमितिलाई वैधानिकता दिएपछि मात्र आफूहरू नियमित महाधिवेशनमा जाने अडान दोहोर्याएका छन्।
बुधबार आयोजित संस्थापनइतर पक्षीय नेताहरूको भेलामा सहभागी नेताहरू गुरु बराल, डा. रणबहादुर रावल लगायतले विधि र विधानअनुसार निर्वाचित १४औँ महाधिवेशनको केन्द्रीय कार्यसमितिलाई मान्यता दिनुपर्नेमा जोड दिएका हुन्। उनीहरूले पार्टीको वैधानिकताको विषयमा सर्वोच्च अदालतमा विचाराधीन मुद्दाको अन्तिम फैसला आएपछि १५औँ महाधिवेशनको तयारीमा जुट्ने र त्यसमा सबै समूह सहभागी हुनुपर्ने धारणा राखेका छन्।
नेता बरालले पार्टीलाई छिटो सुदृढ बनाएर जनतामाझ लैजान आवश्यक रहेको उल्लेख गर्दै त्यसका लागि १४औँ महाधिवेशनबाट निर्वाचित संरचनालाई विधिवत् स्वीकार गरेर अघि बढ्नुपर्ने बताए। उनले सबै नेता–कार्यकर्तालाई व्यक्तिगत आग्रह र पूर्वाग्रह त्यागेर आगामी महाधिवेशनमा एकजुट हुन आह्वान गरे।
त्यस्तै, नेता डा. रावलले तत्कालीन महामन्त्री गगन थापा समूहले विशेष भेला मार्फत गठन गरेको केन्द्रीय कार्यसमिति वैधानिक नभएको दाबी गरे। उनले सो समितिलाई सर्वोच्च अदालतको निर्णय नआएसम्म मान्यता नदिने स्पष्ट पार्दै १४औँ महाधिवेशनबाट निर्वाचित नेतृत्वकै आधारमा १५औँ महाधिवेशनको तयारी गर्नुपर्ने धारणा राखे।
रावलले नेपाली काँग्रेस विधि, मूल्य र मान्यतामा आधारित पार्टी भएकाले प्रक्रियाविपरीत गठन गरिएका संरचनालाई स्वीकार गर्न नसकिने बताए। उनले १४औँ महाधिवेशनबाट निर्वाचित केन्द्रीय समिति स्वतः खारेज नहुने भन्दै विशेष महाधिवेशनबाट बनेको समितिलाई अस्वीकार गर्ने अडान दोहोर्याए।
यता, संस्थापन पक्ष भने नियमित महाधिवेशनको तयारीमा अघि बढिसकेको बताइएको छ।
