काठमाडाैँ । नेपाल प्रहरीले अप्रिल फूलको अवसर पारेर सामाजिक सञ्जालमार्फत सार्वजनिक गरेको एक सचेतनामूलक पोस्टले अनलाइन स्क्यामबारे जनचेतना फैलाएको छ।
बुधबार प्रहरीको आधिकारिक सामाजिक सञ्जाल पेजमा सार्वजनिक गरिएको उक्त सामग्रीमा हतकडी लगाइएको पृष्ठभूमि र प्रहरीको लोगो प्रयोग गरिएको थियो। पोस्टमा क्यूआर कोड स्क्यानसँग सम्बन्धित सन्देश राख्दै सुरुमा सर्वसाधारणलाई झुक्याउने शैली अपनाइएको थियो।
पछि प्रहरीले उक्त सामग्रीलाई सचेतनामूलक अभियानको रूपमा स्पष्ट गर्दै अज्ञात वा अपरिचित स्रोतबाट प्राप्त हुने क्यूआर कोड स्क्यान नगर्न आग्रह गरेको छ। डिजिटल प्रविधिको बढ्दो प्रयोगसँगै क्यूआर कोडमार्फत हुने ठगीका घटनाहरू पनि बढ्दै गएकाले सचेत रहनुपर्ने सन्देश दिइएको हो।
प्रहरीले प्रयोगकर्तालाई कुनै पनि क्यूआर कोड स्क्यान गर्नु अघि त्यसको स्रोत प्रमाणित गर्न, शंका लागेमा प्रयोग नगर्न र यस्ता जानकारी परिवार तथा समुदायमा पनि साझा गर्न आग्रह गरेको छ। अनलाइन सुरक्षालाई प्राथमिकतामा राख्दै यस्तो प्रकारका सचेतनामूलक गतिविधि आवश्यक रहेको प्रहरीले जनाएको छ।
प्रहरीले डिजिटल माध्यममा हुने सम्भावित ठगी र जोखिमबाट जोगिन सावधानी अपनाउन सबैलाई अनुरोध गरेको छ।
