काठमाडाैँ । स्याङ्जामा सार्वजनिक सवारी साधनमा यात्रा गरिरहेकी एक किशोरीमाथि दुर्व्यवहार गरेको आरोपमा जीप चालकलाई प्रहरीले नियन्त्रणमा लिएको छ।
प्रहरीका अनुसार चैत १६ गते अपराह्न करिब ४:३० बजे पोखराबाट वालिङतर्फ जाँदै गरेको सार्वजनिक जीपका चालकले सवारी साधनको बाँया सिटमा बसेकी १६ वर्षीया बालिकामाथि ‘ब्याड टच’ लगायत अस्वाभाविक व्यवहार गरेको आरोप लागेको हो।
घटनापछि वडा प्रहरी कार्यालय वालिङ तथा अस्थायी प्रहरी पोष्ट रामबाच्छाबाट खटिएको प्रहरी टोलीले चालकलाई वालिङ नगरपालिका–१ रामबाच्छाबाट पक्राउ गरेको हो। पक्राउ पर्नेमा स्याङ्जाको विरुवा गाउँपालिका–७ निवासी ४९ वर्षीय अन बहादुर गुरुङ रहेका छन्। उनी चलाइरहेको सवारी साधनको नम्बर ग.१ ज. ७०६६ रहेको प्रहरीले जनाएको छ।
उक्त घटनामा संलग्न चालकविरुद्ध बालयौन दुरुपयोग कसूर अन्तर्गत मुद्दा दर्ता गरिएको छ। मिति २०८२ चैत १७ गते स्याङ्जा जिल्ला अदालतबाट ७ दिनको म्याद थप अनुमति लिई अनुसन्धान तथा कानुनी प्रक्रिया अघि बढाइएको प्रहरीले जनाएको छ।
