काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र राष्ट्रिय सभा सदस्य महन्थ ठाकुरबिच भेटवार्ता भएको छ।
बुढानिलकण्ठस्थित सभापति लामिछानेको निजी निवासमा भएको उक्त भेटमा समसामयिक राजनीतिक अवस्था, मधेस क्षेत्रको विकास तथा प्राथमिकताका योजनाहरूका विषयमा छलफल भएको जनाइएको छ।
भेटका क्रममा देशको वर्तमान राजनीतिक परिस्थितिलाई प्रभावकारी रूपमा व्यवस्थापन गर्दै विकासका एजेन्डालाई अघि बढाउने विषयमा विचार आदानप्रदान भएको थियो।
छलफलमा मधेसको समग्र विकासका लागि पूर्वाधार, रोजगारी सिर्जना तथा क्षेत्रीय सन्तुलनमा विशेष ध्यान दिनुपर्ने आवश्यकता औंल्याइएको स्रोतले जनाएको छ।
साथै, पछिल्लो जनादेशअनुसार मुलुकको समग्र विकासका लागि सहकार्य गरेर अघि बढ्ने विषयमा दुवै पक्ष एकमत भएका छन्।
