काठमाडाैँ । सरकारको सिफारिसमा रामचन्द्र पौडेलद्वारा संघीय संसद्को अधिवेशन आह्वान भएसँगै संसद् सचिवालयले राजनीतिक सहमति र कार्यसूची तय गर्न सर्वदलीय बैठक बोलाएको छ।
संघीय संसद् सचिवालयका प्रवक्ता एकराम गिरीका अनुसार बुधबार दिउँसो १ बजे बस्ने सर्वदलीय बैठकमा प्रमुख राजनीतिक दलका प्रतिनिधि, सरकारका सदस्य तथा सचिवालयका अधिकारीहरूको सहभागिता रहनेछ। प्रतिनिधिसभाको पहिलो बैठक सुरु हुनुभन्दा करिब एक घण्टा अघि उक्त बैठक आयोजना गर्न लागिएको हो।
यसअघि २१ फागुनमा सम्पन्न प्रतिनिधिसभा सदस्य निर्वाचनबाट निर्वाचित सांसदहरूको पहिलो बैठक १९ चैत दिउँसो २ बजेका लागि तय गरिएको छ। पहिलो बैठकसँगै संसदीय प्रक्रिया औपचारिक रूपमा अघि बढ्नेछ।
संसद् बैठकको प्रमुख एजेन्डा सभामुख चयन प्रक्रिया सुरु गर्नु रहनेछ। साथै, परम्पराअनुसार प्रमुख राजनीतिक दलका शीर्ष नेताहरूले संसद्को प्रारम्भिक बैठकमा शुभकामना मन्तव्य राख्ने सम्भावना पनि रहेको छ।
