महासंघको ६०औँ वार्षिक साधारणसभा अन्तर्गत हुने निर्वाचनका लागि वस्तुगततर्फका कार्यकारिणी समिति सदस्यहरूको उम्मेदवारी घोषणा कार्यक्रममा सम्बोधन गर्दै अध्यक्ष ढकालले आगामी नेतृत्व पनि सम्भव भएसम्म सर्वसम्मत रूपमा चयन हुनुपर्नेमा जोड दिए। उनले आफू विगतमा विभिन्न पदमा सर्वसम्मत रूपमा निर्वाचित भएको स्मरण गर्दै प्रदेशस्तरमा समेत सर्वसम्मत नेतृत्वको अभ्यास सुरु भइसकेको जानकारी गराए।
आफ्नो कार्यकालका उपलब्धिहरू उल्लेख गर्दै उनले ‘प्राइभेट सेक्टर प्रोटेक्सन एण्ड प्रमोसन प्लान’ लाई महत्वपूर्ण उपलब्धिका रूपमा प्रस्तुत गरे। उनका अनुसार वर्तमान सरकारले पहिलो मन्त्रिपरिषद् बैठकबाटै उक्त रणनीतिक योजना कार्यान्वयन गर्ने निर्णय गरिसकेको छ।
निर्वाचनमा सहभागी उम्मेदवारहरूलाई लक्षित गर्दै उनले अर्काको आलोचना गरेर भन्दा आफ्ना एजेण्डा र क्षमताका आधारमा मत माग्न सुझाव दिए। नेतृत्व प्राप्तिका लागि इमान्दार प्रयास र पवित्र भावना आवश्यक रहने उल्लेख गर्दै उनले कर्म गरेपछि फल स्वतः प्राप्त हुने विश्वास व्यक्त गरे।
उनले कुनै ठूलो व्यावसायिक पृष्ठभूमि नभए पनि कडा मेहनत र इमान्दारिताकै कारण आफू महासंघको नेतृत्वमा पुग्न सफल भएको अनुभव सुनाए। साथै, एक प्रदेशमा मात्रै सर्वसम्मत नेतृत्व घोषणा हुन बाँकी रहेको जानकारी दिँदै यसलाई देशव्यापी रूपमा विस्तार गर्नुपर्नेमा जोड दिए।
अध्यक्ष ढकालले निजी क्षेत्रलाई केवल नाफामुखी समूहका रूपमा नहेरी रोजगारी सिर्जना, अर्थतन्त्रमा योगदान र राजश्व संकलनमा यसको महत्वपूर्ण भूमिकालाई स्वीकार गर्नुपर्ने बताए। उनका अनुसार निजी क्षेत्रले देशमा ८६ प्रतिशतभन्दा बढी रोजगारी सिर्जना गर्ने, करिब ८० प्रतिशत जीडीपीमा योगदान दिने र प्रमुख राजश्व स्रोतका रूपमा काम गरिरहेको छ।
महासंघभित्रको गुटबन्दी अन्त्य गरी एकतावद्ध रूपमा अघि बढ्न उनले पदाधिकारी तथा सदस्यहरूलाई आग्रह गरे। साथै, आगामी दिनमा निजी क्षेत्रका समस्याहरू समाधान गर्न र व्यावसायिक गतिविधि विस्तार गर्न महासंघ सधैं सक्रिय रहने प्रतिबद्धता उनले व्यक्त गरे।
