काठमाडाैँ ।प्रधानमन्त्री सुशीला कार्कीले हालै सम्पन्न प्रतिनिधि सभा सदस्य निर्वाचनलाई नेपालको लोकतान्त्रिक यात्राको ऐतिहासिक उपलब्धि भएको बताउनुभएको छ ।
बुधवार निर्वाचन आयोगले आयोजना गरेको जलपान कार्यक्रममा बोल्दै प्रधानमन्त्री कार्कीले वर्तमान सरकारले जेन–जी आन्दोलनपछिको असामान्य अवस्थालाई सामान्यकरण गर्दै तोकिएकै मितिमा निर्वाचन सम्पन्न गर्न सफल भएको उल्लेख गर्नुभयो । उहाँले निर्वाचन गराउने कार्य अत्यन्त चुनौतीपूर्ण भए पनि सरकार संवैधानिक दायित्व पूरा गर्न सफल भएको दाबी गर्नुभयो ।
प्रधानमन्त्री कार्कीका अनुसार तत्कालीन परिस्थितिमा देशको सुरक्षा अवस्था अत्यन्त संवेदनशील थियो भने राजनीतिक दलहरूबीच संवादहीनता कायम थियो । यस्तो अवस्थामा कानुनी तथा राजनीतिक शून्यता सिर्जना भए पनि सरकारलाई निर्वाचन सम्पन्न गर्ने जिम्मेवारी प्राप्त भएको र छ महिनाभित्रै सफलतापूर्वक निर्वाचन गराउन सक्नु महत्वपूर्ण उपलब्धि भएको उहाँको भनाइ छ ।
उहाँले राष्ट्रपति रामचन्द्र पौडेलले तोकिदिएको मितिभित्र स्वच्छ, निष्पक्ष र शान्तिपूर्ण वातावरणमा निर्वाचन सम्पन्न गरेर संवैधानिक प्रणालीलाई सुदृढ बनाइएको उल्लेख गर्नुभयो । निर्वाचनले लोकतान्त्रिक मूल्य–मान्यतालाई मजबुत बनाउँदै देशलाई नयाँ राजनीतिक अध्यायतर्फ अघि बढाएको उहाँले बताउनुभयो ।
प्रधानमन्त्री कार्कीले निर्वाचनमार्फत मतदाताले स्थिर सरकार, सुशासन र समृद्धिको पक्षमा स्पष्ट जनादेश दिएको दाबी गर्नुभयो । उहाँले निर्वाचन सम्पन्न गर्न सरकार, सुरक्षा निकाय र निर्वाचन आयोगले समन्वयात्मक रूपमा काम गरेको उल्लेख गर्दै कार्यवाहक प्रमुख निर्वाचन आयुक्त रामप्रसाद भण्डारीको नेतृत्वमा आयोगले प्रभावकारी भूमिका खेलेको बताउनुभयो ।
उहाँले यसपटकको निर्वाचनले सुरक्षा, स्वच्छता, मितव्ययिता र समयपालनामा नयाँ मानक स्थापित गरेको दाबी गर्नुभयो । निर्वाचन घोषणापछि पनि मतदाता नामावली संकलन गरी ठूलो संख्यामा युवा मतदातालाई समेटिएको, राष्ट्रिय परिचयपत्र प्रणालीसँग तथ्यांक अन्तरआवद्धता गरी प्रक्रिया सहज बनाइएको उहाँको भनाइ छ ।
त्यस्तै मौज्दात सामग्रीको पुनःप्रयोग, सकेसम्म स्वदेशी सामग्रीको प्रयोग र सरकारी संयन्त्रमार्फत पारदर्शी खरिद प्रक्रियाले निर्वाचन खर्च नियन्त्रणमा उदाहरणीय अभ्यास स्थापित भएको उहाँले बताउनुभयो । आचारसंहिताको कडा निगरानी र सुदृढ सुरक्षा व्यवस्थाका कारण कुनै पनि मतदान केन्द्रमा पुनः मतदान गर्नुपर्ने अवस्था नआएको पनि उहाँले उल्लेख गर्नुभयो ।
प्रधानमन्त्री कार्कीले निर्वाचन सफल बनाउन योगदान दिने अन्तर्राष्ट्रिय समुदाय, सुरक्षा निकाय, निर्वाचन आयोग तथा सम्बन्धित सबै पक्षलाई धन्यवाद व्यक्त गर्नुभयो ।
