काठमाडाैँ ।सुनसरीकाे रामधुनी नगरपालिका–६ स्थित शङ्करबेली सिमसार पछिल्ला वर्षहरूमा आन्तरिक पर्यटकको आकर्षक गन्तव्यका रूपमा विकास हुँदै गएको छ। करिब १३ वर्षअघि स्थापना गरिएको उक्त सिमसार क्षेत्र उपभोक्ता समितिको सक्रियता, संरक्षण तथा सरसफाइ अभियानसँगै प्रदेश र स्थानीय सरकारको सहयोगमा व्यवस्थित पर्यटकीयस्थलका रूपमा विस्तार गरिएको हो।
सिमसार व्यवस्थापन समितिका पूर्वअध्यक्ष रत्न राईका अनुसार यहाँ दैनिक हजारौँ पर्यटकको आगमन हुने गरेको छ। वनभोजको याममा दैनिक १० हजारभन्दा बढी र ‘अफ सिजन’मा समेत दैनिक करिब १५० जना पर्यटक आउने गरेको उहाँले जानकारी दिए।
राईका अनुसार कात्तिकदेखि पुससम्म तथा वैशाख १५ देखि जेठ २० सम्म वनभोजका लागि यहाँ विशेष भीड लाग्ने गर्दछ। शङ्करबेली वन उपभोक्ता समितिले संरक्षण गर्दै आएको यो सिमसार प्राकृतिक मनोरञ्जन र वनभोजका लागि उपयुक्त स्थलका रूपमा परिचित छ। विशेषगरी वैशाख महिनामा शिरीषका फूल फुल्दा यहाँको सौन्दर्य झन् मनमोहक बन्ने र सो समयमा पर्यटकको चाप उल्लेख्य रूपमा बढ्ने गरेको समितिको भनाइ छ।
यस क्षेत्रमा एकै पटक करिब ११० वटा टोलीले वनभोज गर्न सक्ने क्षमता रहेको छ। वनभोजका लागि आउने टोलीबाट ३०० रुपैयाँदेखि एक हजार रुपैयाँसम्म शुल्क लिने गरिएको छ। उक्त शुल्कबाट सिमसारको संरक्षण, सरसफाइ तथा व्यवस्थापन कार्य सञ्चालन हुँदै आएको समितिले जनाएको छ।
करिब साढे चार बिघा क्षेत्रफलमा फैलिएको सिमसारमा कोशी प्रदेश सरकारद्वारा आर्थिक वर्ष २०८०/८१ मा विनियोजित दुई करोड रुपैयाँबाट विभिन्न पूर्वाधार निर्माण गरिएको उपभोक्ता समितिका सदस्य निश्चल तामाङले जानकारी दिए।
सिमसारको बीचमा निर्माण गरिएको ‘ह्वाइट हाउस’ पनि पर्यटक आकर्षणको मुख्य केन्द्र बनेको छ। रामधुनी नगरपालिकाको करिब एक लाख ५० हजार रुपैयाँको लागतमा निर्माण गरिएको उक्त संरचनाले सिमसारको सौन्दर्य थप बढाएको छ।
हाल यहाँ धरान, इटहरी, विराटनगर, झापा र उदयपुरलगायत विभिन्न जिल्लाबाट मात्र नभई भारतबाट समेत पर्यटक आउने गरेका छन्।
