काठमाडौं । सत्तारुढ नेपाल कम्युनिस्ट पार्टी (नेकपा)ले सभामुख चयनका लागि छलफल तीव्र बनाएको छ । पुस ४ गते अपराह्न ४ बजे संघीय संसदको बैठक आह्वान भएसँगै त्यस अगावै सहमति जुटाउने अन्तिम प्रयास भइरहेको छ । नेकपामा अहिले सभामुखका विषयमा तीन जनाको नाम चर्चामा रहेको छ । पूर्वसभामुख सुवास नेम्वाङ, अग्नि सापकोटा र उपसभामुख शिवमाया तुम्बाहाङफेको नाम चर्चामा छ ।
प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच निरन्तर यसविषयमा छलफल भईरहेकाले बिहीबारसम्म टुंगोमा पुग्ने नेताहरुले जानकारी दिएका छन् । यद्यपी नेकपाले सभामुख लिने पक्कापक्की भएकाले उपसभामुखको राजीनामा समेत आउने लगभग पक्का जस्तैछ । ‘पहिला सभामुख कसलाई बनाउने भनेर शीर्ष दुई नेताबीच नाममा सहमति जुटेपछि पार्टीले उपसभामुखलाई पदबाट राजीनामा गर्न निर्देशन दिनेछ’, एक नेताले भने,‘उपसभामुखले राजीनामा दिएपछि संसदले सभामुख चयनको प्रक्रिया सुरु गर्नेछ ।’
स्रोतका अनुसार सभामुख पदको जिम्मेबारी संसदीय दलका उपनेता नेम्वाङलाई दिने नेकपाभित्र मोटामोटी सहमति भएको दाबी गरेको छ । पाँचौँ अधिवेशनको बैठक बस्नु अगावै सभामुख चयन प्रक्रियाअघि बढाउने तयारी गरेको सत्ता नेतृत्वकर्ता दल नेकपाले पूर्व सभामुख नेम्वाङलाई जिम्मेवारी दिन लागेको हो । उनलाई सभामुख बनाउने तयारी भएपछि नेम्वाङले गृहजिल्ला इलाम जाने कार्यक्रमसम्म स्थगित गरिसकेका छन् । नेकपाभित्र अध्यक्ष ‘प्रचण्ड’ समेत नेम्वाङको नाममा सहमति जनाईसकेको स्रोतको दाबी छ ।
प्रवक्ता नारायणकाजी श्रेष्ठले भने सभामुखको नाममा छलफल जारी रहेपनि औपचारिक सहमति नभएको बताए । उनले नेताहरुबीच छलफल चलिरहेकाले संसद बैठक अगावै सहमति जुट्ने जानकारी दिए । ‘पार्टीभित्र सभामुख कसलाई बनाउने भनेर छलफल चलिरहेको छ,’ प्रवक्ता श्रेष्ठले भने,‘बिहीबारसम्ममा सभामुखको विषयमा ठोस निर्णय आउन सक्छ ।’ नेताहरूबीच अन्तिम सहमतिका लागि बिहीबार पुन छलफल हुने भएको छ । नेकपाका मुख्य सचेतक देव गुरुङले नीतिगत रूपमा भएका व्यवस्थाका आधारमा वैधानिक विधिद्वारा सभामुख चयनको प्रक्रिया अघि बढ्ने बताउँदै पार्टीले चयन गर्ने उम्मेदवारको नाममा विवाद नरहने स्पष्ट पारे ।
नेकपाले सभामुख पद आफैँले राखेर उपसभामुखमा राष्ट्रिय जनमोर्चाकी दुर्गा पौडेललाई अघि सार्ने तयारी गरेको स्रोतको भनाइ छ । जनमोर्चासँग चुनावी तालमेल समेत गरिसकेको नेकपाले उपसभामुख भने उसैलाई दिने तयारी गरेको हो । संविधान अनुसार प्रतिनिधिसभाको सभामुख र उपसभामुख एउटै दलको हुन नहुने र फरक लिङ्गको हुनुपर्ने बाध्यकारी व्यवस्था रहेको छ ।
तर, नेकपाभित्र तत्काल फेरी कुनै सहमति नजुटेमा भने संसद संचालन नियमावली संशोधन गरेर उपसभामुखले नै केही समय संसद चलाउने छिन् । नियमावलीले संसदको प्रारम्भ र अन्त्य सभामुखले नै गर्नुपर्ने व्यवस्था उल्लेख छ । यो नियमलाई परिवर्तन गरेपछि मात्रै उपसभामुखले सभामुखको हैसियतमा संसदको शुरु गर्ने बैठकको अध्यक्षता गर्न पाउनेछिन् । सौर्य दैनिकबाट
