काठमाडौं । राजश्व अनुसन्धान विभागले बहुराष्ट्रिय कम्पनी बरुण वेभरेज प्रालीले झण्डै ६५ करोड राजश्व ठगी गरेको आरोपमा मुद्दा दायर गरेको छ । सो वेभरेजले चर्चित पेय पदार्थ पेप्सीको उत्पादक कम्पनी हो । नक्कली भ्याट बिल प्रयोग गरेर ६४ करोड ९६ लाख दुई हजार तीन सय ४० रुपैयाँ राजस्व छलेको आरोपसहित विभागले काठमाडौं जिल्ला अदालतमा मुद्दा दायर गरेको छ ।विभागले सञ्चालकहरू अमित गुप्तासहित सात जनामाथि बिगो, जरिवाना र ३ वर्ष जेल सजायको दाबी गर्दै मुद्दा हालेको छ ।
विभागले ६४ करोड ९६ लाख दुई हजार तीन सय ४० रुपैयाँ बिगो तथा बिगोको दोब्बर जरिवाना एक अर्ब २९ करोड ९२ लाख चार हजार ६ सय ८० रुपैयाँ गरी कुल एक अर्ब ९४ करोड ८८ लाख सात हजार २० रुपैयाँ दाबी गर्दै मुद्दा हालेको छ । बरुण वेभरेजले झुट्टा कारोबार मनसाय राखी नक्कली विजक तयार पार्ने व्यक्तिसँग मिलेर वास्तविक रूपमा मालबस्तु नै खरिद नगरी झुट्टा तथा नक्कली कर विजय तयार पार्ने प्रयोजनका लागि योजनाबद्ध रूपमा दर्ता गरिएका फर्महरूबाट जारी गरेका बिजक खरिद गरेर राजश्व छलेको विभागको आरोप छ ।
बरुण वेभरेज प्रालि र यसका पूर्व तथा वर्तमान सञ्चालकहरूबाट विभागले एक अर्ब ६० करोडको बैंक जमानत लिएको छ । विभागले गरेको अनुसन्धानबाट वरुण वेभरेजले आर्थिक वर्ष ०७०/०७१ देखि ०७५/०७६ सम्ममा झुटा मूल्य अभिवृद्धि करको कारोबारबाट भ्याट करतर्फ २५ करोड ३४ लाख र आयकरतर्फ साभांशसमेत गरी ३९ करोड ६१ लाख गरी कुल ६४ करोड ९६ लाख राजस्व छली गरेको देखिएको छ ।
विभागले सञ्चालकहरू अमित गुप्ता, रविकान्त जयपुरिया, रोहित कोहली, प्रविन कुमार अग्रवाल, विनोद सिंह भनिने विनोदकुमार सिंह र अशोक कुमारलाई मुद्दा हालिएको छ । उनीहरूबाट यो रकम असुलसहित तीन वर्ष कैदको माग गर्दै मुद्दा हालिएको विभागले जानकारी दिएको छ । सौर्य दैनिकबाट
