काठमाडाैँ । प्रधानमन्त्री सुशीला कार्कीले जनकपुरधामस्थित प्रसिद्ध धार्मिक तथा ऐतिहासिक जानकी मन्दिरमा दर्शन तथा पूजाआराधना गरेकी छन् । आज बिहान नेपाली सेनाको हेलिकप्टरमार्फत जनकपुरधाम पुग्नुभएकी प्रधानमन्त्री कार्कीले जानकी मन्दिरमा विशेष पूजाअर्चना गरेकी हुन् ।
मन्दिरमा उनलाई महन्थ रामतपेश्वर दास तथा उत्तराधिकारी महन्थ रामरोशन दासले स्वागत गर्दै पुष्पमाला र प्रसाद प्रदान गरेका थिए। त्यस अवसरमा मन्दिरका पुजारीहरूले स्वस्तिवाचनसमेत गरेका थिए।
पूजाआराधनापश्चात् प्रधानमन्त्री कार्कीले मन्दिर परिसरको परिक्रमा गरी अवलोकन गर्नुका साथै यसको ऐतिहासिक तथा धार्मिक महत्वबारे आवश्यक जानकारी लिएकी थिइन् । त्यसपछि सञ्चारकर्मीसँग संक्षिप्त प्रतिक्रिया दिँदै उनले जनकपुरधाम आफ्नो विशुद्ध धार्मिक यात्राको गन्तव्य भएको बताइन् ।
प्रधानमन्त्री कार्कीले जनकपुरधाम नेपालको धार्मिक तथा सांस्कृतिक दृष्टिले अत्यन्त महत्वपूर्ण स्थल भएको उल्लेख गर्दै यसको संरक्षण र प्रवर्द्धन सरकारको प्राथमिकतामा रहेको बताइन्। उनले जनकपुरधामसहित देशभरका धार्मिक तथा ऐतिहासिक सम्पदाको संरक्षण र विकासमा सरकार प्रतिबद्ध रहेको धारणा राखिन्।
उहाँले जनकपुरधामलाई अन्तर्राष्ट्रियस्तरको धार्मिक पर्यटन गन्तव्यका रूपमा विकास गर्ने सरकारको लक्ष्य रहेको पनि उल्लेख गरिन्। साथै, अन्तरिम सरकार सुशासन, विकास र स्थायित्वलाई केन्द्रमा राखेर अघि बढिरहेको भन्दै सबै पक्षसँग सहकार्य गरेर अघि बढ्ने प्रतिबद्धता जनाइन् ।
यसअघि जनकपुर विमानस्थलमा मधेस प्रदेशका गृह, सञ्चार तथा कानुनमन्त्री फकिरा महतो, प्रमुख सचिवसहित प्रदेश तथा जिल्लास्तरीय सुरक्षा निकायका प्रमुख र धनुषाका प्रमुख जिल्ला अधिकारी प्रेमप्रसाद लुइँटेललगायतले प्रधानमन्त्री कार्कीको स्वागत गरेका थिए ।
