काठमाडाैँ । काठमाडौँ महानगरपालिकाभित्र शैक्षिक सत्र २०८२ को आधारभूत तह (कक्षा ८) उत्तीर्ण परीक्षा सुरू भएको छ । चैत ५ गतेदेखि सुरू भएको यस परीक्षामा यस वर्ष १९ हजार ११७ जना विद्यार्थी सहभागी भएका छन् ।
महानगरपालिकाको शिक्षा विभागले परीक्षाका लागि ५७ वटा केन्द्र निर्धारण गरेको छ । जसमध्ये ४७ वटा सामुदायिक विद्यालय र १० वटा संस्थागत विद्यालयमा परीक्षा केन्द्र कायम गरिएको हो । गत वर्ष ५६ वटा केन्द्र कायम गरिएकोमा यस वर्ष एक केन्द्र थपिएको हो ।
विशेष आवश्यकता भएका विद्यार्थीहरूलाई लक्षित गर्दै अटिजम भएका तथा लेखन सहयोगी आवश्यक पर्ने विद्यार्थीका लागि होम सेन्टरमै प्रश्नपत्र उपलब्ध गराएर परीक्षा दिने व्यवस्था मिलाइएको छ । यस्तै, नक्सालस्थित केन्द्रीय बहिरा माध्यमिक विद्यालयमा अध्ययनरत बहिरा विद्यार्थीहरूको आवश्यकतालाई ध्यानमा राख्दै सोही विद्यालयलाई परीक्षा केन्द्र तोकिएको छ ।
जगन्नाथ देवल माध्यमिक विद्यालय तथा बन्दी विकास आधारभूत विद्यालय कारागारभित्र सञ्चालनमा रहेका विद्यालयहरूमा अध्ययनरत विद्यार्थीहरूको सुरक्षालाई ध्यानमा राख्दै ती विद्यालयमै परीक्षा केन्द्र कायम गरिएको महानगरपालिकाले जनाएको छ ।
परीक्षालाई व्यवस्थित, विश्वसनीय र प्रभावकारी बनाउने उद्देश्यका साथ संस्थागत विद्यालयहरूको कक्षा ८ को वार्षिक परीक्षासमेत महानगरपालिकाबाटै सञ्चालन, व्यवस्थापन तथा प्रमाणीकरण गरिने व्यवस्था गरिएको छ ।
परीक्षाको पहिलो दिन महानगरपालिकाका प्रमुख प्रशासकीय अधिकृत सरोज गुरागाईं, शिक्षा विभागका प्रमुख नमराज ढकाल, प्रशासन विभागका प्रमुख महेश काफ्ले लगायतको टोलीले विभिन्न परीक्षा केन्द्रहरूको अनुगमन गरेको थियो । अनुगमनपछि गुरागाईंले परीक्षा मर्यादित र व्यवस्थित रूपमा सञ्चालन भइरहेको प्रतिक्रिया दिए ।
परीक्षा समितिका अध्यक्षसमेत रहेका विभागीय प्रमुख ढकालका अनुसार यस वर्ष ४९४ वटा विद्यालयका विद्यार्थी परीक्षामा सहभागी भएका छन् । सहभागीमध्ये १० हजार ७४५ जना छात्र र ८ हजार ३७२ जना छात्रा रहेका छन् ।
विद्यालयको प्रकृतिका आधारमा हेर्दा २ वटा कारागार र एक विशेष विद्यालयसहित ७७ वटा सामुदायिक विद्यालयका ४ हजार ६१४ जना, २० वटा वैकल्पिक विद्यालयका ८३७ जना, ६ वटा धार्मिक विद्यालयका ७० जना तथा ३९१ वटा संस्थागत विद्यालयका १३ हजार ५९६ जना विद्यार्थी परीक्षामा सहभागी भएका छन् ।
गत वर्ष १८ हजार २९४ जना विद्यार्थी सहभागी भएकोमा यस वर्ष ८२३ जना बढी विद्यार्थी परीक्षामा सहभागी भएका छन् । परीक्षा सञ्चालनका लागि सम्बन्धित विद्यालयका प्रधानाध्यापकलाई नै केन्द्राध्यक्षको जिम्मेवारी दिइएको महानगरपालिकाले जनाएको छ ।
