काठमाडौं । नेपाल भ्रमण वर्ष २०२० को सहयोगका लागि उपत्यकाका सम्पदा क्षेत्रमा रंगरोगन गर्न जापानबाट आएका स्वयंसेवक खटिएका छन् । टेकुस्थित बागमती नदी किनारको दायाँबायाँका मन्दिर क्षेत्रमा तीन जना जापानी स्वयंसेवी समूहले रंगरोगन गर्यो । जसलाई ललितपुर महानगरपालिका–२ मा रहेको सृष्टि महिला समूहले पनि साथ दिएको थियो । युवा स्वयंसेवीलाई नेपाल ल्याउन जापानको ओशाकास्थित सन्तानको अपरेसनले मुख्य भूमिका खेलेको थियो ।
स्वयंसेवी समूहले शनिबार राजतीर्थस्थित राम मन्दिर र नारायण मन्दिर क्षेत्रमा रंगरोगन गरी चिटिक्क बनाएको छ । रंगरोगन गर्न ओसिमा गेन र खाइ साको जापानबाट एक महिनाअघि नेपाल आएका हुन् । उनीहरूलाई नेपालमा एक वर्षअघिदेखि बसी विभिन्न सामाजिक काममा क्रियाशील सन्तान कोअपरेसनका प्रतिनिधि दाइसुरे कियामा र २४ वर्ष अघिदेखि विश्वभाषा क्याम्पसमा जापानीज भाषा पढाउँदै आएकी मिडौरी साकामोतोले पनि साथ दिएकी थिइन् ।
यो समूहले यसअघि चितवनको मेघालीस्थित धर्मपुर क्षेत्रका १०० परिवार थारुका घरमा पनि रंगरोगन गरी चिटिक्क पारेको थियो । पर्यटकीय क्षेत्रका घर र सम्पदा क्षेत्रमा रंगरोगन गर्दा नेपाल भ्रमण वर्षका लागि सहयोग पुग्ने उनीहरूले बताए । ठमेलको केही मन्दिरमा समेत रंगरोगन गरेको यो स्वयंसेवी समूहले वसन्तपुर क्षेत्रका सम्पदामा पनि काम गर्ने सोच बनाएको छ ।रंगरोगनमा समूहले सञ्चालन गरेको चित्रकला प्रशिक्षणमा सहभागी भएका ३० जना बालबालिकाले पनि सहयोग गरेका थिए ।
तीन महिनासम्म प्रशिक्षण दिइएको थियो । फागुनपछि फेरि प्रशिक्षणलाई निरन्तरता दिइने सृष्टि महिला समूहले जनाएको छ । सन्तान कोअपरेशनको सहयोगमा सृष्टि महिला समूहले गत वर्ष माघदेखि विपन्न वर्गका बालबालिकालाई पोषणयुक्त खाना खुवाउने कार्यक्रमसमेत राममन्दिरमा आयोजना गर्दै आएको छ । पाक्षिकरूपमा त्रिपुरेश्वस्थित विश्वनिकेतन माध्यमिक विद्यालय र सानेपास्थित टीकाभैरव विद्याश्रम माध्यमिक विद्यालयमा अध्ययनरत ५० बालबालिकालाई पोषणयुक्त खाना खुवाउँदै आएको समूहकी अध्यक्ष पारु डंगोल राउतले जानकारी दिए ।
ललितपुर महानगरपालिकाले दुई पटकसम्म उत्कृष्ट काम गर्ने महिला समूहका रूपमा सूचीकृत गरेको समूहले यस क्षेत्रको सांस्कृतिक सम्पदा सफाइमा समेत योगदान गर्दै आएको छ । यस क्षेत्रका अमूर्त सम्पदा अर्थात् जात्रा लगायतको संरक्षणमा समेत समूहले सहयोग गर्दै आएको छ । सौर्य दैनिकबाट
