काठमाडौं । प्रतिनिधिसभामा समानुपातिक तर्फका उम्मेदवार सिफारिस गर्न संसदको सबैभन्दा ठूलो दल राष्ट्रिय स्वतन्त्र पार्टी (रास्वपा) को सचिवालय बैठक आज बस्दैछ ।
पार्टी प्रवक्ता मनिष झाका अनुसार बैठक वनस्थलीस्थित पार्टी केन्द्रीय कार्यालयमा बस्ने छ ।
सभापति रवि लामिछानेको निर्देशानुसार सचिवालय बैठक आज बिहान १० बजेका लागि तय गरिएको प्रवक्ता झाले जारी गरेको सूचनामा भनिएको छ ।
यद्यपि यो बैठक हिजो शनिबारका लागि तय भएको थियो । तर पार्टी सभापति लामिछाने अस्वस्थ भएपछि सो बैठक आजका लागि सारिएको हो ।
बैठकका लागि प्रतिनिधिसभा सदस्य निर्वाचनको समानुपातिक उम्मेदवार सिफारिसको एजेन्डा तय गरिएको छ ।
रास्वपाले समानुपातिक तर्फ ५७ स्थान प्राप्त गरेको छ । पार्टीले प्रत्यक्ष तर्फ १२५ स्थान जितेर प्रतिनिधिसभामा दुई तिहाई नजिक रहेको छ ।
नेकपा एमाले र श्रम संस्कृति पार्टीले भने शनिबार नै समानुपातिक तर्फको नाम सिफारिस गरिसकेका छन् ।
