काठमाडौं । नेपाल कम्युनिस्ट पार्टीका अध्यक्षद्वय केपी ओली र पुष्पकमल दाहाल प्रचण्डले आइतबार सम्पन्न चौथो स्थायी समिति बैठकको समीक्षा गरेका छन् । प्रधानमन्त्री निवास बालुवाटारमा सोमबार ओली र प्रचण्डले स्थायी समिति बैठकको समीक्षा गरेका हुन् । उनीहरूले दुई घन्टा बैठकको निर्णयमा केन्द्रित रहेर छलफल गरेका छन् । ‘प्रधानमन्त्री तथा पार्टी अध्यक्ष केपी ओलीलाई अर्का अध्यक्ष प्रचण्डले स्थायी समिति बैठक सञ्चालन, बैठकमा भएको छलफल र निर्णयहरूबारे जानकारी गराउनुभएको हो,’ प्रधानमन्त्रीका प्रेस सल्लाहकार सूर्य थापाले भने ।
प्रधानमन्त्री ओली अस्वस्थ रहेकाले पार्टी कार्यालय, धुम्बाराहीमा सम्पन्न बैठकमा सहभागी भएनन् । बैठकअवधिभर प्रचण्डले अर्का अध्यक्ष ओलीलाई नियमित ब्रिफिङ र परामर्श गर्दै आएका थिए । बैठक सम्पन्न भएलगत्तै प्रचण्डले पुनः ओलीलाई भेटेर ब्रिफिङ गरेका हुन् । २९ मंसिरबाट सुरु भएको नेकपाको चौथो स्थायी समिति बैठक ६ पुसमा पाँचबुँदे निर्णय र चारबुँदे समसामायिक प्रस्ताव पारित गर्दै सम्पन्न भएको थियो ।
बैठकले अध्यक्ष ओली–प्रचण्डको राजनीतिक प्रतिवेदन परिमार्जनसहित पारित गर्नुका साथै एमसिसी (मिलेनियम च्यालेन्ज कम्प्याक्ट) सम्झौताका सम्बन्धमा सचिवालयबाट निष्कर्षमा पुग्ने निर्णय गरेको थियो । एक वर्षपछि बसेको स्थायी समिति बैठकमा नेताहरूले प्रस्तावित एजेन्डामा छलफल गरेको र सर्वसम्मत निर्णय भएकाले बैठकले पार्टी एकतालाई बलियो बनाउन योगदान पुगेको दुई अध्यक्षले निष्कर्ष निकालेका छन् । त्यस्तै, उनीहरूबीच २३ पुसमा बोलाइएको केन्द्रीय कमिटी बैठकबारे समेत छलफल भएको स्रोतले जनाएको छ । नयाँ पत्रिका दैनिकबाट
