काठमाडाैँ । चितवन ३ बाट निर्वाचित प्रतिनिधिसभा सदस्य सोविता गौतमले निर्वाचन कानुनअनुसार आफ्नो निर्वाचन खर्चको विवरण सार्वजनिक गरेकी छन्।
प्रतिनिधिसभा सदस्य निर्वाचन ऐन २०७४ को दफा ७२ तथा निर्वाचन आयोगद्वारा स्वीकृत आचारसंहिताअनुसार उनले निर्वाचन अवधिमा भएको सम्पूर्ण खर्चको विवरण आयोगसमक्ष बुझाएको बताएकी छन्।
उक्त विवरण अनुसार मनोनयन दर्तामा ५ हजार रुपैयाँ खर्च भएको उल्लेख छ। प्रचार–प्रसार सामग्रीमा ३ लाख १७ हजार ४०० सय रुपैयाँ खर्च गरिएको छ भने मतदाता प्रशिक्षणका लागि १ दिनमा ३० हजार रुपैयाँ खर्च गरिएको जनाइएको छ। त्यसैगरी नमुना मतपत्र तथा घोषणा पत्र छपाइमा ७४ हजार २ सय रुपैयाँ खर्च भएको विवरणमा उल्लेख छ।
वडा स्तरीय प्रचार–प्रसारका लागि २८ वडामा सञ्चालन गरिएको कार्यक्रममा करिब १ लाख रुपैयाँ खर्च गरिएको छ। त्यस्तै १५ दिनका लागि सवारी साधन प्रयोग गर्दा चालकसहित ३ लाख २५ हजार रुपैयाँ खर्च भएको उल्लेख गरिएको छ। सचिवालय प्रयोजनका लागि स्टेशनरीमा २३ हजार ४४५ रुपैयाँ खर्च भएको विवरणमा जनाइएको छ।
निर्वाचन अभियानका क्रममा खाद्यान्न, रासन तथा पानी व्यवस्थापनका लागि १ लाख १८ हजार रुपैयाँ खर्च भएको विवरणमा उल्लेख गरिएको छ।
यसरी विभिन्न शीर्षकमा भएको खर्च जोड्दा कुल निर्वाचन खर्च ९ लाख ९३ हजार ४५ रुपैयाँ पुगेको विवरणमा उल्लेख गरिएको छ।
