काठमाडाैँ । जापानले आफ्नो पहिलो स्वदेशी विकसित लामो दूरीको मिसाइल प्रणाली तैनाथ गर्दै दक्षिणपश्चिमी सुरक्षा सुदृढ पार्ने तयारी अघि बढाएको छ। सेनाले सोमबार राति कुमामोटो प्रान्तको क्याम्प केङ्गुनमा अपग्रेड गरिएको टाइप–१२ ल्यान्ड–टु–शिप मिसाइल तैनाथ गर्ने प्रक्रिया अन्तिम चरणमा पुगेको जानकारी दिएको छ।
मुख्य क्याबिनेट सचिव मिनोरु किहाराले मार्च अन्त्यसम्म मिसाइलहरू पूर्णरूपमा तैनाथ गरिने बताए। यद्यपि, तैनाथीका विस्तृत विवरण गोप्य राखिएको छ। स्थानीय बासिन्दा र विपक्षी दलहरूले पारदर्शिताको अभाव भएको भन्दै विरोध जनाएका छन्। कुमामोटोका गभर्नर ताकाशी किमुराले पनि प्रान्तीय प्रशासनलाई औपचारिक जानकारी नदिइएकोमा असन्तुष्टि व्यक्त गरे ।
मित्सुबिशी हेभी इन्डस्ट्रिजले विकास गरेको अपग्रेड टाइप–१२ मिसाइलको मारक क्षमता करिब एक हजार किलोमिटर पुग्ने बताइएको छ। यसले जापानको मुख्यभूमिबाट चीनसम्म लक्षित गर्न सक्ने क्षमता राख्छ। जापानले यसै मिसाइल प्रणालीलाई यस वर्षको अन्त्यतिर सिजुओका क्याम्प फुजीमा पनि तैनाथ गर्ने योजना बनाएको छ।
पछिल्ला वर्षहरूमा जापानले सुरक्षा पूर्वाधार विस्तार गर्दै ओकिनावा, इशिगाकी र मियाको टापुहरूमा पीएसी–३ अवरोधक र मध्यम दूरीका सतह–देखि–हावा मिसाइल प्रणाली तैनाथ गरेको छ। यसैबीच, प्रधानमन्त्री ताकाइचीले जापानी सेनालाई मानव रहित लडाकू प्रणाली र लामो दूरीका मिसाइलमार्फत थप सुदृढ बनाउने प्रतिबद्धता व्यक्त गरेका छन्।
साथै, सरकारले घातक हतियार निर्यातसम्बन्धी कडा प्रतिबन्धलाई खुकुलो बनाउने तयारी गर्दै रक्षा उद्योग विस्तार र मित्र राष्ट्रहरूसँग सैन्य सहकार्य बढाउने नीति अघि बढाइरहेको छ।
