काठमाडौं : चीन सरकारले नेपालको प्रतिनिधिसभाका लागि भएको निर्वाचन सफलतापूर्वक सम्पन्न भएकोमा नेपाललाइ बधाई दिएको छ ।
बेइजिङमा शुक्रबार आयोजित नियमित पत्रकार सम्मेलनमा चिनिया विदेश मन्त्रालयकी प्रवक्ता माओ निङले यही फागुन २१ (मार्च ५) मा नेपालमा सम्पन्न प्रतिनिधिसभा निर्वाचन शान्तिपूर्ण र सुव्यवस्थित रूपमा सम्पन्न भएकोमा चीनले स्वागत गरेको बताउनुभयो ।
एक सञ्चारकर्मीको प्रश्नको जवाफ दिँदै उहाँले नेपालको निर्वाचन आयोगका अनुसार करिब ६० प्रतिशत मतदाता सहभागिता भएको उक्त मतदानपछि नेपालले आफ्नो राजनीतिक एजेन्डालाई स्थिर रूपमा अगाडि बढाइरहेको देख्दा चीन खुसी भएको बताउनुभयो ।
प्रवक्ता माओले चीनले नेपालसँगको सम्बन्धलाई परम्परागत मैत्रीपूर्ण छिमेकी सम्बन्धका रूपमा उच्च महत्व दिने बताउनुभयो । उहाँका अनुसार दुवै देशले स्वतन्त्रता, सार्वभौमसत्ता र भौगोलिक अखण्डताको संरक्षणमा एक–अर्कालाई समर्थन गर्दै आएका छन् ।
उहाँले चीन नेपालसँग मिलेर दिगो मित्रता, विकास र समृद्धिका लागि रणनीतिक सहकार्यात्मक साझेदारीलाई अझ सुदृढ बनाउँदै अगाडि बढ्न तयार रहेको पनि बताउनुभयो ।
