काठमाडौं । विभिन्न समस्यालाई पार लगाउँदै १०२ मेगावाट क्षमताको मध्य भोटेकोशी जलविद्युत कम्पनी लिमिटेडको काम अगाडि बढेको छ । करिब ८ किलोमिटर लामो सुरुङ खन्नुपर्नेमा अब ९३९ मिटर मात्र बाँकी छ भने हेडवक्र्सको कंक्रिटको काम शुरु भएको छ । हेडवक्र्समा बाढीबाट सुरक्षित गर्न नदीको सतहभन्दा माथि बाँध बाँध्ने काम अबको छ महिनामा सकिने आयोजनाले जनाएको छ । साथै पावरहाउसको काम पनि चालू छ ।

सिभिल कन्स्ट्रक्सनको काम सन् २०२० को मार्च अप्रिलमा सकिनेछ भने त्यसको छ महिनामा इलेक्ट्रो मेकानिकको काम सक्ने लक्ष्यका साथ अगाडि बढेको कम्पनीका प्रमुख कार्यकारी अधिकृत मणिकुमार काफ्लेले बताए । सन् २०१४ को जनवरीमा ४३ महिनामा आयोजना सम्पन्न गर्ने लक्ष्यका साथ शुरु भएकामा बाढी, पहिरो, भूकम्प र नाकाबन्दीका कारण समयमा काम सम्पन्न हुन नसकेको आयोजनाको भनाई छ । त्यस्तै चाकु क्षेत्रको निर्माण स्थल समयमै ठेकेदारलाई दिन नसकेको र मुआब्जाको समस्या समाधानमा समेत समय लागेकाले निर्माण कार्यमा ढिलाई भएको हो ।

सन् २०२० को डिसेम्बर ३१ मा सबै काम सिध्याएर विद्युत उत्पादन थाल्ने लक्ष्यका साथ काम भइरहेको काफ्लेले जानकारी दिए । सन् २०१४ को सम्झौता अनुसार ४३ महिना अर्थात् सन् २०१७ को जुनमा आयोजना सम्पन्न हुनुपर्ने थियो । आयोजनाको म्याद शुरुमा २४ महिना र पछिल्लो पटक १८ महिना थप गरिएको छ । आयोजनाका प्रमुख सुनिल कुमार लामाले आयोजनाको शुरुको लागत १२ अर्ब २८ करोड रहेपनि पछि १४ अर्ब ८० करोड हुँदै अन्त्यमा १५ अर्ब ३ करोड भएको जानकारी दिए ।

यो आयोजना जनताको लगानीबाट बनेको हो र बैंकको ब्याज तिर्नुपर्ने हुन्छ । त्यसैले अबका दिनमा एक दिन पनि काममा ढिलाई हुँदा १ करोड घाटा हुने उनले बताए । उनले विद्युत उत्पादन गर्ने कुरा राज्यको समेत दायित्व हुने भएकाले आइपर्ने कुनै पनि समस्यालाई तत्काल समाधान गर्न सबैको चासो र सहयोग आवश्यक रहेको समेत बताए । आयोजनाको मूख्य ठेकेदार चिनियाँ कम्पनी गुआन्जु हाइड्रो इलेक्ट्रिकल कम्पनी हो । आयोजनाले अग्रिम रकम उपलब्ध गराइसकेको छ । त्यसैको दायरामा रही काम सँगसँगै भुक्तानी दिने गरिएको आयोजनाले जनाएको छ ।

कम्पनीमा रकम अभाव रहेको देखिएका कारण कम्पनीलाई पहिले नै सचेत पनि गराइएको छ । तर हाल समस्या उस्तै देखिएको छ । उक्त कम्पनीसँग पर्याप्त मेसिनरी र जनशक्ति दुबैको अभाव छ । अहिले हेडवक्र्सको काममा पावरहाउसका मजदूर खटाइएको छ, त्यसैले लक्ष्य अनुसार काम सम्पन्न हुन्छ भन्न सक्ने स्थिति छैन । यो मुख्य समस्याका बारेमा माथिल्लो तहसम्मलाई जानकारी गराइएको र अझ पनि यस विषयलाई समाधान गर्न सकिए आयोजना तोकिएकै मितिमा सम्पन्न हुन सक्ने लामाले दाबी गरेका छन् ।