इङलिस प्रिमियर लिगको उपाधिका लागि आर्सनललाई पछ्याइरहेको म्यान्चेस्टर सिटीले लिड्स युनाइटेडलाई १–० गोल अन्तरले पराजित गरेको छ ।
लिड्सको गृह मैदान इल्यान्ड रोड रंगशालामा आइतबार राति भएको खेलमा लिड्सले सिटी विरुद्ध निकै प्रभावशाली खेल खेलेपनि अन्तत: गोल भने सिटीले गरेको थियो ।
सिटीका लागि एकमात्र गोल ४२औं मिनेटमा एन्टोन सेमेन्योले गरेका थिए । खेल अवधिमा झण्डै ७० प्रतिशत समय बल आफ्नो नियन्त्रणमा राखेको सिटीले लिड्सको पोस्टमा १२ पटक प्रहार गरेको थियो । तर लिड्सले पनि सिटीका पोस्टमा १४ पटक प्रहार गरेर प्रत्याक्रमणको योजना राम्रैसँग प्रस्तुत गरेको थियो ।
यो जितसँगै सिटीले शीर्ष स्थानमा रहेको आर्सनलसँगको अंक दुरी २ मा झारेको छ । आर्सनलको समान २८ खेलबाट ६१ अंक छ भने सिटीको ५९ अंक छ । यसबाट दुबै टिमबीच उपाधि दौड थप खुला भएको छ ।
उता, लिगमा उत्कृष्ट ४ का लागि संघर्षरत लिभरपुलले गएरातिको खेलमा रेलिगेसन जोनमा रहेको वेस्टह्याम युनाइटेडलाई ५–२ गोल अन्तरले पराजित गरेको छ । यो जितसँगै लिभरपुल ४८ अंक सहित पाँचौं स्थानमा रहन सफल भएको छ ।
लिभरपुलको गृह मैदान एन्फिन्डमा सम्पन्न गएरातिको खेलमा लिभरपुलका लागि पहिलो हाफमा तीन गोल भएको थियो । ह्युगो एकिटिकेले पाँचौं, भर्जिल भ्यान जिकले २४औं तथा अलेक्सिस म्याक एलिस्टरले ४३औं मिनेटमा गोल गरेका थिए ।
त्यस्तै, कोडी ग्याप्कोले ७०औं मिनेटमा गोल गरेका थिए भने अक्सेल डिकाक्सीले लिभरपुलका लागि आत्मघाती गोल गरेका थिए । वेस्टह्यामका लागि भने ४९औं मिनेटमा टोमस साउसेक र ७५औं मिनेटमा भ्यालेन्टिन कास्टिलानोसले गोल गरेका थिए ।
आइतबारका अन्य नतिजा
एभर्टन vs न्युक्यासल (३–२)
बर्नमाउथ vs सन्डरल्यान्ड (१–१)
ब्रेन्टफोर्ड vs बर्नली (४–३)
लिगका उत्कृष्ट चार टिम
१. आर्सनल (६१ अंक)
२. म्यान्चेस्टर सिटी (५९ अंक)
३. एस्टन भिल्ला (५१ अंक)
४. म्यान्चेस्टर युनाइटेड (४८ अंक)
