काठमाडौं । समाज कल्याण परिषद्ले भृकुटीमण्डप परिसरभित्र रहेका पसल, स्टल, बुथ तथा भवन प्रयोग गरी व्यवसाय सञ्चालन गर्दै आएका व्यक्ति तथा संस्थालाई बक्यौता रकम १५ दिनभित्र बुझाउन अर्को सूचना जारी गरेको छ।
भाडा नतिरि प्रयोग गर्नेमा नेपाल पत्रकार महासंघ, सार्वजनिक पुस्तकालय, अपाङ्ग महासंघ, रिपोर्टर्स क्लब, उपभोक्ता मंच, फोटो पत्रकार महासंघ, सेजोप, कराते महासंघ, नेपाल नेत्रहिन संघ समेतका संस्थाहरू छन् ।
परिषद्ले भाडामा लिई सञ्चालन गरिएका संरचना तथा जग्गाको भाडा, प्रयोग शुल्कलगायतका रकम लामो समयदेखि नबुझाइएको जनाएको छ। पटक–पटक पत्राचार, निर्देशन तथा सूचना प्रकाशन गर्दा पनि रकम नबुझाइएकाले सार्वजनिक सूचनामार्फत अन्तिम पटक जानकारी गराइएको परिषद्ले उल्लेख गरेको छ।
सूचनामा तोकिएको १५ (पन्ध्र) दिनभित्र सम्बन्धित सबै व्यक्ति तथा संस्थाले बक्यौता रकम बुझाई हिसाब मिलान गर्न आग्रह गरिएको छ। निर्धारित समयसीमाभित्र रकम नबुझाएमा प्रचलित कानुनबमोजिम असुलउपर तथा अन्य आवश्यक कारबाही प्रक्रिया अगाडि बढाइने चेतावनी समेत दिइएको छ।
