राष्ट्रिय स्वतन्त्र पार्टी (रास्वपा) परित्याग गरेका नेताहरुले फागुन २१ गते हुने प्रतिनिधि सभा सदस्स्य निर्वाचनमा विचार गरेर मात्रै मतदान गर्न आग्रह गर्नुभएको छ ।
शनिवार काठमाडौमा पत्रकार सम्मेलन गरी उहाँहरुले चटकदार अनुहारलाई भन्दा देश र समाज बुझेका जिम्मेवार राजनीतिक व्यक्तित्व र दल रोज्न मतदाताहरुलाई आग्रह गर्नुभएको हो । उहाँहरुले देश हाल सबैभन्दा गम्भिर अवस्थामा पुगेकोले सामाजिक सञ्जालको भ्रमभन्दा बाहिर निस्केर सोच विचार गर्न पनि अपिल गर्नुभएको छ । अध्ययन–विश्लेषण गरेर मात्रै मतदान गर्न र स्थायी सरकार निर्माणका लागि विवेकपूर्ण निर्णय लिन उहाँहरुले आह्वान गर्नुभयो ।
वागमती प्रदेशका उपसभापति रहेर हालै रास्वपा परित्याग गर्नुभएका दिनेश हुमागाईंले मतदातालाई भावनात्मक प्रचारभन्दा नीतिगत स्पष्टता र देशवोधका आधारमा मत दिन आग्रह गर्नुभयो । उहाँले चुपचाप नभइ धेरै अध्ययन गरेर मत हाल्न आग्रह गर्नुभयो । उहाँले देशले निकास पाउने र स्थायी सरकार बन्नेगरी मत दिनुपर्नेमा जोड दिनुभयो । उहाँले रास्वपा आफ्नो सिद्धान्तबाट विचलन भएको आरोप लगाउनु भयो ।
समयमा पार्टीले अधिवेशन गर्न नसकेको, निर्वाचनमा उम्मेद्वार चयन प्रक्रिया सही नभएको, नेतृत्वमा जवाफदेहीता नभएको कारण आफूले पार्टी छाडेको उहाँको भनाई छ । उहाँले नयाँको नाममा नेपाली जनता र जेन–जी आन्दोदनमाथी नै धोकाधडी हुन लागेको आरोप लगाउनु भयो ।
उहाँले भन्नुभयो, ‘फागुन २१ गतेका निर्वाचनमा चटकदारहरुलाई मत हाल्ने होइन, राजनीतिक व्यक्तिलाई, देश बुझेको व्यक्तिलाई र समाज बुझेको व्यक्ति र पार्टीलाई तपाईहरुले चुन्नुहोस् । चुपचाप फलानो छाप भनिएको छ, चुपचाप होइन, धेरै अध्ययन गरेर मत हाल्नुस् । दुईचार दिन सोचेपनि हुन्छ । तर देशले निकास पाउनुपर्छ, स्थायी सरकार हुनुपर्छ ।’
रास्वपाबाट अलग भएका प्रणय शमशेर राणाले पार्टी नेतृत्वमाथि संगठनात्मक पारदर्शिता र आन्तरिक लोकतन्त्र कमजोर बनाएको आरोप लगाउनु भयो । उहाँले थितिको थालनी र वेथितिको अन्त्य भन्ने नाराका साथ स्थापना भएको पार्टी हाल उल्टो बाटोतिर हिँडेको दाबी गर्नुभयो । उहाँले उम्मेद्वारी चयन प्रक्रिया संगठनको आधारमा प्राइमरी निर्वाचनबाट हुने भनिएपनि त्यसो हुन नसकेको बताउनु भयो । पार्टी सदस्यहरूलाई स्क्याम गरिएको दाबी गर्दै उहाँले आन्तरिक लोकतन्त्रमा विश्वासघात भएको आरोप लगाउनु भयो । यस विषयमा आफूले पटक पटक आवाज उठाएपनि सुनुवाई हुन नसकेकोले पार्टी छाड्न बाध्य भएको उहाँको भनाई छ ।
उहाँले भन्नुभयो, ‘थितिको थालनी वेथितको अन्त्य भनेको साढे तीन वर्षमा ठ्याक्कै उल्टो भयो । थितिको अन्त्य र चरम वेथितिको थालनी रास्वपामा देखिएको छ । पार्टी नेतृत्वले जहिले पनि आफू अनुकुलको संगठन बनाउन थाल्यो । हामी सम्पुर्ण पार्टी सदस्यलाई स्क्याम गरियो, पार्टी सदस्यलाई मेहनत गर, सोही संगठनको आधारमा प्राईमरी ईलेक्सन हुन्छ भनियो तर चुनावको मुखमा आएर आफ्नो नेतृत्व छान्ने त्यो अधिकार संगठनबाट लुटियो । सम्पुर्ण पार्टी स्क्याममा परेको छ ।’
रास्वपा मधेस प्रदेशकी संस्थापक सभापति समेत रहिसक्नुभएको ममता शर्माले पार्टीभित्र अपारदर्शिता बढ्दै गएको बताउनु भयो । बाहिर पारदर्शिताको कुरा गरिएपनि काम उल्टो देखिएको कारण दैनिक रूपमा पार्टी छाड्नेहरुको संख्या बढिरहेको उहाँको भनाई छ । उहाँले जान्नेलाई छान्ने पार्टीको नारा ठिक उल्टो भएपछि आफूले पार्टी छाडेको जानकारी दिनुभयो । उहाँले जनतालाई झुक्याउने काम मात्रै रास्वपाले गरिरहेको आरोप लगाउनु भयो ।
उहाँले भन्नुभयो, ‘पार्टीले पारदर्शीताको कुरा गर्ने गरेको थियो, तर यहाँभित्र त अपारदर्शीता नै यति धेरै देखियो, त्यसले रास्वपामा लागेका सबै योद्धा साथीहरु प्रतिदिन एक एक गर्दै पार्टी छाड्दै हुनुहुन्छ ।’
रास्वपा त्यागेका नेताहरू प्रणय र ममता नेपाली काँग्रेसमा प्रवेश गर्नुभएको छ भने दिनेश हुमागाईं हालसम्म कुनै पार्टीमा प्रवेश गर्नुभएको छैन । उहाँहरुले मतदातालाई भावनात्मक लहर र आकर्षक नारा भन्दा दीर्घकालीन स्थायित्व, नीतिगत स्पष्टता र आन्तरिक लोकतन्त्रलाई आधार मानेर निर्णय लिन आग्रह गर्नुभएको छ ।
