आदारणीय मतदाता आमा बुवा, दिदी बहिनी तथा दाुजभाइहरु,

यहि फागुन २१ मा हुन गइरहेको प्रतिनिधिसभा निर्वाचनमा हामी तपाइहरुको अमूल्य मत माग्दै गर्दा हाम्रो सच्चा बाचापत्र /प्रतिवद्धता पत्र /घोषणापत्र हजुरहरु सामु प्रस्तुत गरेका छौ । हाम्रो दल जे गर्दछ त्यो प्रतिवद्धता गर्दछ र जे प्रतिवद्धता गर्दछ त्यो पूरा गर्दछ सर्व प्रथम हामी हजुरहरुलाई यस कुरामा विश्वस्त गराउन चाहन्छौ ।

हामी तपाइहरुलाई सपना बाड्न आएका थिएनौ, होइनौ र भविष्यमा पनि सपना बाडेर मत माग्ने छैनौ । हाम्रो समाज, हाम्रा प्रवृत्ति, धरातलीय यथार्थ बाहिर हामी जान चाहदैनौ र सक्दैनौ पनि । हामी मतदाताबाट एक इन्च पनि टाढा रहन सक्दैनौ मात्र होइन कल्पना सम्म पनि गर्न सक्दैनौं । मतदाताको इच्छा, बानी व्यवहार र प्रवृत्ति हाम्रा मूख्य आधार हुन । विगतमा भएका आन्दोलनका मर्म र भावनालाई हामी विर्सिन सक्दैनौं ।

हामी अनुमानयोग्यतामा विश्वास गर्दछौं । भविष्यमा के गर्ने भन्ने विषय हाम्रा नीति, विगतका अभ्यास समेतबाट सहजै अनुमान गर्न सकिन्छ । निर्वाचनमा सरकारले निष्पक्षता कायम गर्नेमा हामी शंका गरिरहेका छौं । हामीलाई विश्वास छ कि हामी अत्यधिक मत सहित विजयी हुने छौ । यदि सोचे अनुसारको नतिजा नआएको अवस्थामा हाम्रो शंका सत्य सावित हुनेछ । त्यस्तो नतिजा सहजै स्वीकार हामी गर्ने छैनौं ।

सरकार र विपक्षीहरुले हामी विरुद्ध धेराबन्दी गरेकोमा छानवीनको माग हुनेछ । हाम्रो नेतृत्वले पराजय भोग्नु परेमा आउने असहज परिस्थितिको जिम्मा सरकारले लिनु पर्दछ । यो हाम्रो मात्र होइन समग्र मतदाताको आवाज हो भन्नेमा हामी दृढ छौ ।

सभ्य समाज, नैतिक समाजको विकास हाम्रो प्राथमिकतामा रहनेछ । त्यसैले हामी उपर कसैले कुनै आरोप, प्रत्यारोप, गाली गलौज नगरोस भन्ने चाहन्छौ । हामीलाई नैतिकता र इमान्दारिता कसैले सिकाइरहनु पर्दैन । यो बाचापत्र पढ्दै जानुहोस हामी कति नैतिक र इमान्दार छौ आफै अन्दाज गर्न सक्नुहुनेछ ।

आमा बुवा, दिदी बहिनी तथा दाुजभाइहरु,

अव हामी क्षेत्रगत रुपमा हाम्रा बाचा वा प्रतिवद्धता तपाई सामु राख्ने अनुमती चाहन्छौ ।

संसदीय अंक गणित र हाम्रो दल:

नेपालका दलहरुलाई लाग्दै आएको आरोप आन्तरिक लोकतन्त्र भएन भन्ने नै हो । हाम्रो दल यो आरोपबाट मुक्त रहनेछ । विचार एवं सिद्धान्तका आधारमा हुने कुनै पनि गठबन्धनमा भन्दा हामी सत्ता र अवसर केन्द्रित गठवन्धन गर्न कुनै कसर वांकी राखिने छैन । किनकि हामी देश र जनताको सेवाका लागि समर्पित दल हौ ।

यसका लागि छेपारोले रंग फेरेजस्तै गरी हामी विहान, दिउसो र वेलुका अलग अलग दलसंग साझेदारी गर्न प्रयास गर्ने छौ । दल सम्वन्धी कानून संशोधन वा परिमार्जन गरी दल एवं नेतृत्वको मात्रात्मक बृद्धिमा जोड दिनेछौ किनकी हामीलाई प्रष्ट छ कि हामी बहुदलीय व्यवस्थामा विश्वास गर्दछौ । यो कुरा पनि हामीलाई हेक्का छ कि सरकार इतर बसेर हामी तपाईको सेवा गर्न सक्दैनौ ।

राजनीति र अपराधप्रतिको दृष्टिकोण:

राजनीति र अपराधलाई लिएर आम असन्तुष्टि बढीरहेकोमा हामी चिन्तित छौ । इतर दलहरुले राजनीतिक लाभ हानीका आधारमा गर्ने राजनीतिको अपराधिकरण र अपराधको राजनीतिकरण हामीलाई कदापी स्वीकार्य हुने छैन । त्यसैले समाजमा डर त्रास फैलाउने, अपराधिक मानसिकता भएका व्यक्ति वा समूहहरुको तथ्यांक संकलन गरी तीनको विश्लेषण गरिनेछ ।

दाजुभाइ तथा दिदी बहिनीहरु हामी यो विश्वास दिलाउन चाहन्छौ कि उक्त विश्लेषणका आधारमा तत्तत् क्षेत्रमा दक्षता हासिल गरेका वा गर्न सक्ने देखिएका व्यक्ति वा समूहसंग हामी सामिप्यमा रहने छौ । सके उनीहरुमा अवसर र सेवा केन्द्रित गर्नेछौ नसकेमा हाम्रो प्राथमिकतामा पारिनेछ । हामी यहांनिर मतदाताहरुलाई विश्वस्त दिलाउन चाहन्छौ कि आगामी प्रदेश सभा तथा स्थानीय तहको निर्वाचनमा त्यस्ता पात्रहरुलाई टिकट दिई तपाईहरु माझ पठाउने नै छौं ।

विगतमा राज्यले प्रतिशोष साधेर जेल पठाएका त्यस्ता नेपाल आमाका सन्तानहरुलाई आम माफी दिइनेछ । अदालतमा भएका मुद्दा फिर्ता लिई निजहरुलाई हाम्रो पाटीमा भित्राउने छौ ।

सुशासन र भ्रष्टाचार नियन्त्रण:

भर्खर भएको जेनजी आन्दोलनको मर्म र भावनाको अपनत्व हामी लिनेछौ । देशमा भ्रष्टाचार र अनियमितता गर्नेहरु उपर कठोर बन्ने संकल्प गर्दछौ । हामी तपाई आम नागरिकको प्रतिनिधित्व गर्ने दल हौं । तपाईको अभिमत, विश्वास हामी र हाम्रो दलमाथि भएकोले हामी माथि प्रश्न उठाउनु भनेको तपाई माथि प्रश्न उठाउनु हो भन्ने कुरामा दृढ छौ ।

त्यसैले त अख्तियार, प्रहरी लगायतका निकायहरु हाम्रो पाइलामा जसले अवरोध पुराउनेछ उसका विरुद्ध परिचालित गर्ने छौं । संसदको अंक गणितलाई ख्याल राखि यसतर्फ हामी थप संवेदनशील बन्नेछौ । हाम्रा कदमहरुमा अवरोध सिर्जना गर्ने पश्चगामी, देशद्रोही हुन भन्ने कुरामा तपाई विश्वास गर्नुहुन्छ भन्ने हामी अपेक्षा गर्दछौ ।

प्रशासन र सेवा प्रवाह:

राज्यका प्रशासनिक संरचना जनताको पक्षमा सशक्त परिचालन गरिनेछ । हामी तपाइको मतबाट चुनिएर आएपश्चात जो जे गर्दै जान्छौ त्यो पक्कै पनि जनकेन्द्रित हुनेछ । प्रशासनलाई निष्पक्ष र तटस्थ राख्ने कुरामा कुनै कसूर बांकी राख्ने छैनौ । विगत, चुनावी माहोलको वर्तमान तथा भविष्यमा हाम्रा विरुद्ध लाग्ने कोहि कसैलाई प्रशासनिक जालमा जुनसुकै बखत पार्नेछौ । हामी पारदर्शीतामा विश्वास गर्दछौ । त्यसैले हामी भोलि जे गर्दछौ त्यो तपाईमाझ आजै प्रस्तुत गरिरहेका छौ ।

ठूला आयोजना, ठेक्का पट्टाहरुमा हाम्रो चासो र सरोकार रहने नै छ तर पनि हामी कुनै कानूनी झमेलामा फस्नेवाला छैनौ किनकी हामी तपाईहरुका जनप्रतिनिधि हौ । त्यसैले राजनीतिक हस्तक्षेपका आधारमा हामी कर्मचारीलाई आफू अर्थात तपाई केन्द्रित निर्णय गर्न बाध्य पारिनेछ । कदाचित हामी विपक्षीमा रहेमा चाहेर पनि हामीलाई जनताको नजरमा गिराउन नसकुन भन्ने तर्फ हामी संवेदनशील छौ । सरुवा, पदस्थापना तथा बढुवाजस्ता विषय हाम्रो नियन्त्रणमा नै रहनेछन । प्रशासनको कुण्डलीको उपयोग हाम्रो प्राथमिकतामा रहने नै छ ।

सार्वजनिक सेवा प्रवाह पूर्णतया अनलाइनमा आधारित बनाइने र मुख्य मुख्य कार्यका लागि अनलाईन प्रणाली मै तगारो थापिने छ । परिचयपत्र, पासपोर्ट, लाइसेन्स, लालपूर्जा र यस्तै सेवा प्रवाहका लागि निजी क्षेत्रलाई संलग्न गराइनेछ । निजी क्षेत्र जो जनताको सेवा (हामीप्रति बफादार) मा तल्लिन हुनेछ उसको कब्जामा यी सेवालाई सुरक्षित राखिनेछ ।

विदेश सम्वन्ध: भाले न पोथी

आदारणीय मतदाताहरु,

नेपालको परराष्ट्र सम्वन्ध थप प्रभावकारी बनाइनेछ । विदेश नीति समय र परिस्थिति अनुसार संचालन गरिनेछ । हामी सत्तामा वा सत्ता इतर रहदा हाम्रो विदेश नीति तदअनुसार नै हुनेछ । सत्तामा रहदां छिमेकी तथा मित्र राष्टलाई हेर्ने दृष्टिकोण र सत्ता बाहिर हुंदा विलकुल फरक हुनेछ किनकी हाम्रो भूमिका नै फरक भैसकेको हुनेछ ।

बजारमा बहसमा रहेका डक्ट्रीनहरुबारे हामी पूर्ण जानकार नै छौ । हामीलाई अनुकूल दृष्टि राख्नेहरु प्रति हामी अनुग्रहित हुनेछौ । निर्वाचन वा यस्तै वेलामा हाम्रो छवी पूर्णतया राष्ट्रवादी हनेछ । यसका लागि हामी साम्राज्यबाद् वा विस्तारबाद् वा पूजीबाद् वा यस्तै बाद्हरुको विरोध गर्नेछौ । सत्तामा हामी तपाइहरुको वा आफ्नै क्षमताले पुगेका हुनेछौं भने इतर वैदेशिक हस्तक्षेपबाट ।

संसदमा हाम्रो भूमिका:बाह्रौ खेलाडी

स्वभाविक रुपमा संसद सरकार जन्माउने थलो हो । हामी संसदमा सशक्त भूमिका निर्वाह गर्नेछौ । नागरिकका हक अधिकारको सुनिश्चितताको लागि हामी लडिरहने छौं । सभामुख, संसदीय समितिको नेतृत्व प्राप्ती पहिलो प्राथमिकतामा राखेका छौ । दलीय पक्षधरताका आधारमा नेतृत्व परिचालित हुंदा त्यसको लाभ हानीको वारेमा हामी दिक्षित छौ । महत्वपूर्ण पदहरु नियन्त्रणमा राखि संसदलाई तपाईको इच्छा अनुसार संचालन गर्नेछौ । तपाइको इच्छाको सहि प्रतिनिधित्व गर्ने हामी नै भएकोमा हामी फेरीपनि सचेत सजग छौ ।

हामी अनुकूलता प्रतिकूलता हेरी संसदको अधिवेशन तथा वैठकहरु संचालन गर्ने नगर्ने विषय निर्धारण गर्नेछौ । स्पष्ट बहुमत नआएको अवस्थामा अंक गणितीय खेललाई हामी रोमान्चित बनाउने छौ । सत्ता पक्ष रहंदा घण्टौ लगाएर पोडियमबाट विपक्षीको सत्तोसराप गर्नेछौ भने विपक्षीमा बस्नु पर्ने वाध्यतात्मक अवस्थामा हामी संसदमा नाराबाजीमा सिमिति हुने छैनौं । तोडफोड, हानाहानलाई सामान्य रुपमा लिइनेछ र भनिनेछ यसको जिम्मा सत्तापक्षले लिनु पर्दछ ।

आन्दोलनलाई हेर्ने हाम्रो नजर

जेनजी आन्दोलनको मर्म र भावना हाम्रै थियो, हो र रहनेछ । हामी नागरिक क्रान्तीलाई सम्मान गर्ने दल हौ । त्यसैले त हामी विगतका सवै आन्दोलनलाई आफ्नै ठान्दै आयौ । चैत्र २५ को राजाबादी आन्दोलन होस वा कोशी तिरको पहिचानको आन्दोलन नै किन नहोस त्यहा हामीलाई नै देख्दछौं । लाग्दोहो कि हजुरहरुलाई पृथक पृथक आन्दोलन कसरी अपनत्व ? हामी नागरिकका आवाज सुन्न चाहन्छौ । हामी सत्तामा छैनौ भने सवै माग र आन्दोलन हाम्रै हैनन र ?

आदरणीय मतदाताहरु,

जव हामी सिंहदरवार पुग्दछौ तव देशद्रोहीले आगो लगाएको देख्दछौ अनि जव आन्दोलनका शहिद परिवार एवं घाइतेलाई भेट्दछौं हाम्रो मुटु भक्कानिएर आउछ । जलेका भाटभटेनी र हिल्टन पुग्दछौ उनीहरुलाई अंगालो हालेर रुन मन लाग्दछ । जव सामाजिक संजालमा जलेका भाटभटेनीहरुका तस्वीर भिडियो सहितका उल्लासमय पोष्ट देख्दछौं । यी जलाउने बेलामा हामी किन त्यहां भएनौ, किन जलाउन पाएनौ ? जस्तो लाग्दछ । कस्तो चरित्र होला ? सोच्दै हुनुहुन्छ ? हामी लोकप्रियताबादमा विश्वास गर्दछौ र त तपाईका पृय छौं । सवै परिस्थिति र अवसरमा एकै रहन कहां सकिन्छ हैन र ?

किसान, सुकुम्वासी र अव्यवस्थित बसोबास:

आगामी पांच वर्षमा गरिव, किसान, सुकुम्वासीहरुलाई हामी परिचयपत्र उपलव्ध गराइनेछ । परिचयपत्रका आधारमा के कस्तो सेवा सुविधा दिने भन्ने विषयमा आगामी आम निर्वाचनका बखत तपाईहरु सामु हामी आउनेछौं । कृषकलाई प्रोत्साहन गर्ने नीति लिइनेछ । कृषिलाई हेर्ने तपाइ मतदाताको दृष्टिकोण भन्दा हामी पृथक हुन सक्दैनौ ।

कृषिलाई जसरी निम्नस्तरको पेशा वा कर्मको रुपमा तपाइहरु सोचिरहनु भएकोछ हामी सम्मान गर्दछौं । कृषि उपजको समर्थन मूल्य व्यावसायी व्यापारीहरुको समन्वय र सहकार्यमा निर्धारण गरिनेछ । रासायनिक मल, विउ विजनको हाहाकार र विचौलियाको जालोवीच तादाम्यता कायम गरिनेछ । सुकुम्वासी र अव्यवस्थित बसोबासीको लगत तथा दलसंगको आवद्धता पहिचान गरिनेछ । चुनावको अंकगणितका आधारमा यसको व्यवस्थापनको नीति लिइनेछ ।

चुनावका बेला पीडा साटिनेछ भने निर्वाचन पश्चात हामी पीडा सम्झाएर नुनचुक लगाउने छैनौ । अर्को निर्वाचनको पर्खाइमा रहनेछौ । किसानका आन्दोलनमा हामी नारा लगाउदै पुग्नेछौ । उनीहरुलाई देखाएर हामी सरकारको आलोचना गर्नेछौ । सत्तामा रहेको वेला पनि हामी उधारो सम्झौता गरी राजधानीबाट तत्काल फर्काउने छौं ।

अन्य दल प्रतिको दृष्टिकोण:

आदारणीय मतदाताहरु, हाम्रो सिद्धान्त, हाम्रा प्रतिवद्धता जनमैत्री रहे भएकोमा कुनै विवाद रहेन । आज नेपाल र नेपालीको जुन अवस्था रहेको छ त्यो हामी इतरका दलहरुकै कारण हो । प्रतिगमनका हिमायती यी दलहरुले भ्रष्टाचार र अनियमिततालाई मलजल गरेका छन । हामी नेपालीको जीवनस्तरमा सुधार गरी आगामी पांच वर्ष भित्र यूरोपियनस्तरको पुराइनेछ । नेपाली राजनीतिमा फष्टाएका फासिष्ट, राष्ट्रघाती……..यी शव्दहरु विपक्षी दलका पर्याय हुन । त्यसैले त हामी तपाइहरुसंग मत मागिरहेका छौ । विदेशीको इशारा र हरियो डलरबाट संचालित यी दलहरु तपाई हाम्रालागि फौंजी किरा सरह हुन ।

अन्तमा,

आदारणीय मतदाताहरु यती वाचापत्रबाटै तपाईलाई थाहा भैसकेको छ कि हामी हरेक क्षेत्र, पेशा, व्यवसायलाई कसरी हेर्दछौं । त्यसैले तपाईको जीवनस्तरमा फड्को मार्न वा मराउन सक्ने दल हामी मात्र हौं । हाम्रा कार्यहरु देखेर सारा विश्व चकित हुनेछ । यूरोप अमेरिका हामीसंग सहयोगको भिख माग्नेछन । लाखौं विदेशी नागरिक भिसाको लागि लाइनमा हुनेछन । यस्तो देश पांच वर्षमा बनाउने योजना, परिकल्पना हामीसंग छ तसर्थ हामीलाई अत्यधिक मत सहित विजयी गराउनुहोस ।

धन्यवाद