आइसिसि टी–२० विश्वकप क्रिकेट अन्तर्गत समूह चरणका आज तीन खेल हुँदैछन् । खेल तालिका अनुसार पहिलो खेल अफगानिस्तान र युएई बिच हुनेछ ।

समूह डी मा रहेर लगातार दुई खेल हारेको अफगानिस्तानले युएईलाई हराएर सुपर ८ मा पुग्ने झिनो आशाका साथ मैदानमा उत्रनेछ । यो खेल भारतको नयाँदिल्लीमा बिहान ११.१५ बजे सुरु हुनेछ ।

यस समूहबाट दक्षिण अफ्रिकाले लगातार तीन खेल जितेर ६ अंकका साथ सुपर ८ मा प्रवेश गरिसकेको छ । दोस्रो स्थानमा रहेको न्युजिल्यान्डको पनि ४ अंक छ । यस समूहको क्यानडाले पनि लगातार तीन खेल हारिसकेको छ ।

दोस्रो खेल समूह सी मा रहेका इङल्यान्ड र इटाली बिच हुनेछ । कोलकाताको इडेन गार्डेन्समा हुने यो प्रतियोगिता अपराह्न ३.१५ बजे हुनेछ ।

नेपाल समेत समावेश यस समूहमा इटालीले नेपाल विरुद्धको खेल जितेर २ अंक जोडेको छ तर इङल्यान्डको चार अंक छ । यस समूहमा रहेको वेस्ट इन्डिज लगातार तीन खेल जितेर ६ अंकका साथ सुपर ८ मा प्रवेश गरिसकेको छ ।

इङल्यान्डले आजको खेल जिते सुपर ८ मा प्रवेश गर्नेछ ।

तेस्रो खेल भने श्रीलंकाको पालिकेल्लीमा साँझ ७.१५ बजे आयोजक श्रीलंका र जित्नै पर्ने दबाबमा रहेको अस्ट्रेलिया बिच हुनेछ ।

निकै रोमाञ्चक हुने अनुमान गरिएको यस खेलमा श्रीलंका विजयी भए सुपर ८ मा प्रवेश गर्नेछ भने अस्ट्रेलिया पराजित भएको खण्डमा सुपर ८ मा प्रवेश पाउन जिम्बाबेको खेल पर्खनु पर्नेछ । अस्ट्रेलियाले अब श्रीलंका र ओमानसँग मात्र खेल्न बाँकी छ ।

यस समूहमा रहेको जिम्बाबेले अस्ट्रेलिया र ओमानलाई पराजित गरेर ४ अंक बटुलेको छ । अब जिम्बाबेले आयरल्यान्ड र श्रीलंकासँग खेल्न बाँकी छ ।

सुपर ८ मा पाइला टेकिसकेका टिमहरु
समूह ए — भारत
समूह सी — वेस्ट इन्डिज
समूह डी — दक्षिण अफ्रिका

आजका खेलहरु
पहिलो खेल : अफगानिस्तान vs युएई (११.१५ बजे)
दोस्रो खेल : इङल्यान्ड vs इटाली (३.१५ बजे)
तेस्रो खेल : अस्ट्रेलिया vs श्रीलंका (७.१५ बजे)