काठमाडौं । राष्ट्रिय सभा सदस्य गोपीबहादुर सार्कीले आगामी निर्वाचनले मात्रै मुलुकको विद्यमान राजनीतिक समस्याहरूको पूर्ण समाधान गर्नेमा आशंका व्यक्त गर्नुभएको छ ।

निर्वाचनका क्रममा मतदाताहरूको मनोविज्ञान र आवश्यकतालाई नजिकबाट नियाल्दा राजनीतिक स्तरमै समस्याको निकास खोजिनुपर्ने उहाँको तर्क छ । निर्वाचनको सिलसिलामा विभिन्न क्षेत्रका मतदाता र विशेषगरी युवाहरूसँगको अन्तक्रियापछि सदस्य सार्कीले संविधान निर्माण र राज्यको पुनर्संरचना भए पनि व्यवहारिक कार्यान्वयनमा अझै चुनौती रहेको बताउनु भयो ।

राष्ट्रिय सभाको शुक्रवारको बैठकमा बोल्दै उहाँले नयाँ र पुराना दुवै पुस्ताका मतदाताहरूको मनोविज्ञान बुझ्दा अहिलेको चुनावले मात्रै सबै राजनीतिक समस्या हल नगर्ने महशुस गरेको उल्लेख गर्नुभयो । उहाँकाअनुसार राज्यको केन्द्रीकृत ढाँचा तोडिएर उत्पीडित मधेसी, मुस्लिम, कर्णाली, जनजाति, दलित र महिलाहरूले अधिकार पाए पनि कानुन निर्माणमा रहेको सुस्तताले गर्दा उनीहरूले राज्यको वास्तविक अपनत्व पूर्णरूपमा महशुस गर्न पाएका छैनन् । संविधानले जनतालाई राज्यको मालिक बन्ने ठाउँसम्म पु¥याए पनि विधि निर्माणको जटिलताले उपलब्धिहरू ओझेलमा परेको उहाँको भनाइ छ ।

उहाँले भन्नुभयो, ‘म अहिले निर्वाचनकै क्रममा जनसमुदायहरूको, मतदाताहरूको बीचमा पनि गइराखेको छु। नयाँ युवा साथीहरूको बीचमा पनि गइराखेको छु। पुराना साथीहरूको मनोविज्ञान पनि बुझिराखेको छु। मतदाताको मनोविज्ञान पनि बुझिराखेको छु र नयाँ साथीहरूको माग, आवश्यकतालाई पनि बुझिराखेको छु । यो स्थिति हेर्दाखेरी अझै पनि मलाई के लाग्छ भने यो चुनावले पनि राजनीतिक हिसावलेसमस्याको समाधान गर्छ जस्तो मलाई लागिराखेको छैन । तर मेरो निवेदन के छ भने राजनीतिक हिसावले समस्याको समाधान हुनुपर्छ। अब देशमा जुन खालको परिस्थिति बन्यो, हामीले संविधान बनायौँ, राज्य परिवर्तन भयो, केन्द्रीयता तोडियो र जनताहरूलाई विशेष गरेर उत्पीडित मधेसी, मुस्लिम, कर्णाली, जनजाति, दलित र महिलालाई यो राज्यको मालिक बन्ने ठाउँसम्म यो एक किसिमको आन्दोलनले देशलाई त्यहाँ पु¥यायो । तर त्यसको व्यवहारिक हिसावको कार्यान्वयनका केही जटिलताहरू भनेको कानून निर्माणकै जटिलता हो, विधि निर्माणकै जटिलता हो र यो जटिलता हामीले हल गर्न सकेनौँ र अबका दिनहरूमा नयाँ चुनावपछि आउने सरकारले त्यसमा तदारुकता देखाउन आवश्यक छ, एक ।’

उहाँले अब बन्ने नयाँ सरकारले कानूनी र विधिगत जटिलताहरूलाई हल गर्न विशेष तदारुकता देखाउनुपर्नेमा जोड दिनुभयो ।