काठमाडौं । राष्ट्रिय सभा सदस्य सुमित्रा विसीले मुलुकका विभिन्न स्थानमा दिनप्रतिदिन हत्या र हिंसाका घटना बढ्दै गएको भन्दै सरकारको गम्भीर ध्यानाकर्षण गराउनुभएको छ ।
उहाँले हालै जनकपुर र दैलेखमा भएका बीभत्स हत्याका घटनाहरूको उल्लेख गर्दै दोषीलाई कानुनी कठघरामा ल्याउन माग गर्नुभएको हो ।
राष्ट्रिय सभाको शुक्रवारको बैठकमा बोल्दै सांसद विसीले २०८२ माघ २८ गते जनकपुरमा २३ वर्षीया अलिता खातुनको सलले घाँटी कसेर हत्या गरिएको घटनाले समाजलाई स्तब्ध बनाएको बताउनु भयो । त्यसैगरी, दैलेख जिल्लाको दुल्लु क्याम्पस रोडमा कक्षा १० मा अध्ययनरत विद्यार्थी प्रकाश खत्रीको उनकै साथीले धारिलो हतियार प्रयोग गरी हत्या गरेको घटनाप्रति पनि उहाँले गम्भीर चासो व्यक्त गर्नुभएको छ । देशका विभिन्न भागबाट यस्ता दुःखद समाचारहरू निरन्तर आइरहेको भन्दै उहाँले शान्ति सुरक्षाको अवस्थाप्रति प्रश्न उठाउनु भयो ।
उहाँले भन्नुभयो, ‘देशका विभिन्न भागहरूमा हत्या–हिंसा बढ्दै गएको समाचारहरू आइरहेका छन्। यही २०८२ माघ २८ गते बुधवार जनकपुरमा २३ वर्षीया अलिता खातुनलाई सलले घाँटी कसेर हत्या गरेको आएको छ । यस्तै गरेर दैलेख जिल्ला दुल्लु क्याम्पस रोड साथीले धारिलो हतियार प्रयोग गरी १० कक्षामा अध्ययनरत प्रकाश खत्रीको हत्या भएको छ । र मृतकहरू प्रति म हार्दिक श्रद्धाञ्जली दिँदै यस्ता हत्याराहरूलाई यथार्थ छानबिन गरी दोषीलाई कडा भन्दा कडा कारबाही गरी पीडितलाई न्याय दिनका लागि म सरकारसँग माग गर्दछु ।’
सांसद विसीले मृतकहरूप्रति श्रद्धाञ्जली अर्पण गर्दै ती घटनाहरूको निष्पक्ष र यथार्थ छानबिन गर्न सरकारसँग माग गर्नुभएको छ । उहाँले पीडित परिवारलाई न्याय दिलाउन र अपराधीलाई कडाभन्दा कडा सजाय सुनिश्चित गर्न गृह मन्त्रालयको ध्यानाकर्षण समेत गराउनुभएको छ ।
