काठमाडौं । नेपाल कम्युनिष्ट पार्टी (नेकपा) अध्यक्ष एवम् पूर्व प्रधानमन्त्री पुष्पकमल दाहाल प्रचण्डले राज्यको नियमलाई खिल्ली उडाएका छन् । अध्यक्ष प्रचण्डले सरकारी कार्यविधिअनुसार पाउने सुरक्षामा ८ गुणा बढी सुरक्षाकर्मी प्रयोग गरेका छन् ।
पूर्व प्रधानमन्त्रीको हैसियतले अध्यक्ष पचण्डले ९ जना मात्रै सुरक्षाकर्मी पाउनु पर्ने ब्यवस्था भएपनि अध्यक्ष प्रच्चण्डले ७७ जना सुरक्षाकर्मी प्रयोग गरेका छन् । यद्यपी विशिष्ठ व्यक्ति सुरक्षा व्यवस्थापन समितिको २०६८ जेठ २५ को निर्णय अनुसार २६ जनासम्म खटाउने व्यवस्था भएपनि प्रचण्डको सुरक्षामा मन्त्रिपरिषदको निर्णयभन्दा ५६ जना बढी सुरक्षाकर्मी खटिएका छन्।
अध्यक्ष प्रचण्डपछि नियमको खिल्ली उडाउदै सुरक्षाकर्मी राख्नेमा प्रमुख प्रतिपक्षी दलका नेता एवम कांग्रेस सभापति शेरबहादुर देउवा पनि कुनै कम देखीएका छैन । देउवाले ३८ जना सुरक्षाकर्मी राखेका छन्।
देउवा स्वयम् प्रधानमन्त्री भएका वेला प्रहरी नायव उपरीक्षकको कमाण्डमा देउवा परिवारलाई २१ जना सुरक्षाकर्मी उपलब्ध गराउने निर्णय भएको थियो। देउवा पत्नी तथा पूर्व सांसद आरजु राणा देउवा र छोरा जयविरसिंह देउवालाई समेत भनेर २०७४ माघ १० गतेको मन्त्रिपरिषद बैठकले सो संख्याको सुरक्षाकर्मी दिने निर्णय गरेको थियो। आफैले गरेको निर्णय भन्दा हाल उनले १८ जना बढी सुरक्षाकर्मी राखेका छन्।
पूर्व प्रधामन्त्री एवम् नेकपाका वरिष्ठ नेता झलनाथ खनालको सुरक्षामा १८ जना खटिएका छन्। अर्का पूर्व प्रधानमन्त्री एवम् नेकपा वरिष्ठ नेता माधवकुमार नेपालको सुरक्षामा १७ जना सुरक्षाकर्मी खटिएका छन्।
मन्त्रिपरिषदका पूर्व अध्यक्ष खिलराज रेग्मीको सुरक्षामा १० जना सुरक्षाकर्मी खटिएका छन्। पूर्व प्रधानमन्त्री लोकेन्द्रबहादुर चन्दको सुरक्षामा १२ जना सुरक्षाकर्मी छन्।
