काठमाडौँ । राष्ट्रिय सभामा नेपाली कम्युनिष्ट पार्टीका सांसद मायाप्रसाद शर्माले निर्वाचन निष्पक्ष र शान्तिपूर्ण रुपमा सम्पन्न गर्नका लागि आवश्यक तयारी गर्न सरकारको ध्यानाकर्षण गराउनुभएको छ ।
शुक्रवार राष्ट्रिय सभा बैठकमा बोल्दै उहाँले निर्वाचन प्रचारको क्रममा सामाजिक सञ्जालमार्फत लागीगलौजका आपत्तिजनक भाषाहरु प्रयोग गरिएकोमा आपत्ति जनाउँदै सम्बन्धित निकायले त्यसमा रोक लगाउनुपर्ने समेत बताउनु भयो । उहाँले राजनीतिक दलहरुले निर्वाचनमा आफ्नो पार्टीको दृष्टिकोणसहित जनतामा प्रश्तुत भएर उनीहरुको विश्वास जित्ने गरी अघि बढ्न आवश्यक रहेको बताउनु भयो । सांसद शर्माले राजनीतिक दलहरुले आफ्नो सैद्धान्तिक दृष्टिकोण जनतामा लिएर जान नसक्ने हो भने त्यसले जनतामा भ्रम सृजना हुने खतरा रहेको बताउनु भयो ।
उहाँले भन्नुभयो, ‘अब निर्वाचन आयो, निष्पक्ष होस्, शान्तिपूर्ण होस्, राजनीतिक दलहरुले निर्वाचनमा तँछाडमछाड भन्दा संैद्धान्तिक दृष्टिकोण समाजवाद हो कि, जनवाद हो कि । लोकतन्त्र हो कि । आफ्नो स्पष्ट दृष्टिकोण राखेपछि जनतालाई बुझाउन सजिलो हुन्छ । फेसबुकमा जथाभावी लेखेको छु, तथानाम गालीगलौज गरेको छ । त्यसले मुलुकलाई गलत बाटोमा लैजान्छ । त्यसकारण सबै राजनीतिक दलहरुले् आफ्नो दृष्टिकोणसहित निर्वाचनमा जान आवश्यक छ ।’
सांसद शर्माले जाजरकोट लगायतका भूकम्प पीडितका लागि राहतको व्यवस्थापनमा ढिलाई नगर्न पनि सरकारलाई सचेत गराउनु भयो ।
