काठमाडौं । नेपाल कम्युनिष्ट पार्टी (नेकपा) का स्थायी कमिटी सदस्य अग्निप्रसाद सापकोटाविरूद्ध माइतीघर मण्डलमा प्रदर्शन गरिएको छ। प्रतिनिधिसभाको रिक्त सभामुख पदका लागि उम्मेदवारी दिएका सापकोटाविरूद्ध प्रदर्शन गरिएको हो ।
हत्या घटनामा अनुसन्धानको क्रममा रहेका व्यक्तिलाई सभामुख नबनाउ भन्दै नागरिक खबरदारी गरेका हुन् । सापकोटालाई काभ्रेका अर्जुन लामाको हत्या आरोप लागेको छ । सापकोटाविरूद्ध सर्वोच्च अदालतमा मुद्दा परेको छ।
उनीमाथि २०६२ सालमा तात्कालिन माओवादीले अपहरणमा परेका काभ्रे छत्रेबाँझका अर्जुन लामाको हत्या गरेको आरोप छ। अपहरण गरेर लगिएका लामाको शव दुई महिनापछि गाडिएको अवस्थामा काभ्रे बुढाखानीमा फेलापरेको थियो।
द्वन्द्वपीडित र नागरिक समाजले व्यक्ति हत्याका आरोपीलाई सभामुख नबनाउन आग्रह गर्दै द्वन्द्वपीडितलाई अपमानित नगर्न पनि उनीहरूले माग गरेका छन्।
