काठमाडौं । अमेरिका भ्रमणमा गएकी उपमेयर उतै हराएकी छन् । कालीकोटको तिलागुफा नगरपालिका उपमेयर दन्ता नेपाली (दर्शना) अमेरिकामै लुकेर बसेकी हुन् ।
गत कात्तिकमा नगरपालिका संघमार्फत गोष्ठीमा सहभागी हुन अमेरिका गएकी नेपालीले अहिलेसम्म कुनै जानकारी नगराएको मेयर रत्नबहादुर शाहीले बताए ।। “नगरपालिका संघले उहाँलगायत केही नगरपालिकाका मेयर– उपमेयरलाई अमेरिकाको एउटा गोष्ठीमा सहभागी गराएको बुझेको छु । उपमेयरले भ्रमणमा जान्छु भनेपछि स्वीकृत पनि भयो । त्यसपछि उहाँ फर्कनुभएको छैन,” उनले भने ।
अमेरिका पुगेपछि उपमेयरसँग एकपटक मात्रै सम्पर्क भएको र बिरामी भएकाले फर्कन नसकेको जानकारी गराएको मेयर शाहीको भनाइ छ । अहिले शाहीको फेसबुक खाता पनि निष्क्रिय छ ।
“उहाँले बिरामी छु । फर्कने तयारी गरिरहेको छु भन्नेसम्म जानकारी गराउनुभएको हो, त्यसपछि उहाँ सम्पर्कमा हुनुहुन्न,” शाहीले भने ।
२०७४ वैशाखमा भएको स्थानीय तहको निर्वाचनमा तत्कालीन माओवादी केन्द्रबाट उमेदवार भएकी नेपाली १ हजार ८४३ मत ल्याएर उपमेयरमा निर्वाचित भएकी थिइन् ।
