युरोपकै प्रतिष्ठित फुटबल प्रतियोगिता च्याम्पियन्स लिगको गएराति भएको खेलमा स्पेनी महारथी रियल म्याड्रिड पोर्चुगाली टिम बेन्फिाकासँग स्तब्ध भएको छ ।
बेन्फिकाको पोर्चुगलस्थित गृह मैदान स्टेडियम अफ लाइटमा भएको यस खेलमा बेन्फिकाले रियलको पोष्टमा चार गोल प्रहार गर्दा रियलले दुई गोल मात्र फर्काउन सकेको थियो । रियलका लागि किलिएन एम्बापेले २ गोल गरेका थिए भने बेन्फिकाका लागि आन्द्रीआसले २ गोल, भान्जेलिस पाभ्लीडिस र गोलकिपर अनातोली ट्रबिनले एक एक गोल गरेका थिए ।
आठौं चरणको यस खेलमा पराजित भएसँगै रियल उत्कृष्ट आठमा पर्न असफल भयो । बराबरी मात्र गर्न सकेको भएपनि रियल उत्कृष्ट आठमा छनौट हुन सक्थ्यो तर यस हारका कारण रियलले अब प्लेअफ खेल्नु पर्ने भएको छ । उता, जोजे मौरिन्होको बेन्फिका भने गोल अन्तरका आधारमा २४औं स्थानमा रहँदै प्लेअफ खेल्न पाउने भाग्यमानी टिम बनेको छ ।
यस खेलमा रियलका दुई खेलाडीले दोहोरो पहेंलो कार्ड पाएर खेलको अन्त्यतिर मैदान छाड्नु परेको थियो । राउल एसेन्सियो र रोड्गिोले खेलको दोस्रो हाफको इन्जुरी समयमा रातोकार्ड पाएका थिए ।
