काठमाडौँ, नेपाल – नेपालस्थित अमेरिकी दूतावासले आद्यन्त अड्भाइजरी, अमेरिकन चेम्बर अफ कमर्स नेपाल तथा आद्यन्त फन्ड म्यानेज्मन्टसँगको साझेदारीमा देशव्यापी प्रविधि ह्याकाथन “कोड फर इम्प्याक्ट : अमेरिका–नेपाल प्रविधि नवप्रवर्तन ह्याकाथन” को औपचारिक सुरुवात गरेको छ ।

छ महिना लामो यस पहलमार्फत नेपालका सातै प्रदेशबाट १७५ जनाभन्दा बढी युवा नवप्रवर्तक, विद्यार्थी, प्रारम्भिक पेसाकर्मी तथा उद्यमका आकाङ्क्षीहरूलाई प्रविधिमा आधारित समाधान विकासका लागि संलग्न गराइनेछ । कार्यक्रमअन्तर्गत प्रादेशिक ह्याकाथन, व्यावहारिक मार्गदर्शन, बीज कोष तथा थप लगानी र विकासका अवसरहरू उपलब्ध गराइनेछन् ।

नेपालस्थित अमेरिकी दूतावासका सार्वजनिक मामिला प्रमुख माइक हार्करले नेपालका युवाहरू असाधारण रूपमा सृजनशील र सक्षम रहेको उल्लेख गर्दै भने, “कोड फर इम्प्याक्टमार्फत काठमाडौँ केन्द्रित अवसरलाई देशभर विस्तार गर्दै उन्नत प्रविधि, मार्गदर्शन र सम्भावनासम्म युवाको पहुँच पुर्‍याउन पाएकोमा हामी गर्व गर्छौँ । यस पहलले अमेरिका–नेपाल साझेदारीलाई अझ सुदृढ बनाउँदै नवप्रवर्तन, सीप विकास र आर्थिक वृद्धिमा योगदान पुर्‍याउनेछ ।”

सातै प्रदेशमा ह्याकाथन, पाँच क्षेत्र केन्द्रित समाधान

ह्याकाथन शृङ्खला माघ ४–५ गते बुटवलबाट सुरु भइसकेको छ । कार्यक्रम माघ ८–९ गते पोखरा, माघ १२–१३ गते धनगढी र विराटनगर (एकैसाथ), माघ १६–१७ गते जनकपुर, माघ १७–१८ गते सुर्खेत हुँदै माघ २२–२३ गते काठमाडौँमा समापन हुनेछ ।

प्रतिस्पर्धीहरूले शिक्षा, स्वास्थ्य, कृषि, पर्यटन र डिजिटल व्यापार क्षेत्रमा देखिएका चुनौतीहरूको समाधान खोज्नेछन् । यस क्रममा नीतिपरक एआई, मानव–केन्द्रित डिजाइन र विश्वव्यापी प्रविधि प्लेटफर्महरूको प्रयोग गरिनेछ । सहभागीहरूलाई अनुभवी संस्थापक, प्रविधि विज्ञ तथा ‘इकोसिस्टम’ नेतृत्वकर्ताहरूको सञ्जालबाट निरन्तर मार्गदर्शन प्रदान गरिनेछ ।

नवप्रवर्तन ‘इकोसिस्टम’ निर्माणतर्फ जोड

सेक्युरिटीपालका संस्थापक तथा यस पहलका साझेदार पुकार हमालले भने, “सुदृढ प्रविधि इकोसिस्टम साझा ज्ञान, निरन्तर प्रयोग र साहसी प्रतिभामाथिको विश्वासबाट निर्माण हुन्छ । नेपालमा त्यस्ता अवस्था सिर्जना गर्दै ‘सिलिकन पिक्स’जस्ता ब्रान्डिङ प्रयासमार्फत हाम्रा प्रविधि क्षमताहरूलाई विश्वस्तरमा स्थापित गर्न सकिन्छ ।”

अमेरिका–नेपाल सम्बन्धलाई प्रविधिमार्फत नयाँ आयाम

अमेरिकाको स्वतन्त्रताको २५०औँ वार्षिकोत्सव नजिकिँदै गर्दा सुरु भएको कोड फर इम्प्याक्ट कार्यक्रमले व्यावहारिक समस्या समाधान र आर्थिक अवसरप्रतिको साझा प्रतिबद्धता उजागर गरेको छ । स्थानीय प्रतिभा र विश्वव्यापी स्रोतसाधनबीचको दूरी घटाउँदै यस पहलले प्रादेशिक समाधानलाई व्यवहार्य उद्यममा रूपान्तरण गर्न मद्दत गर्ने अपेक्षा गरिएको छ ।