काठमाडौँ । नेकपा एमालेले पार्टीका उपाध्यक्ष विष्णु पौडेललाई रुपन्देही–२ बाट प्रतिनिधिसभा उम्मेदवार बनाउने निर्णय गरेको छ।
यसअघि शनिबार राति सम्पन्न सचिवालय बैठकले रुपन्देही–२ खाली राखी पौडेललाई पाल्पा–२ बाट उम्मेदवार बनाउने निर्णय गरेको थियो। तर पार्टी केन्द्रले उक्त निर्णय संशोधन गर्दै उनलाई रुपन्देही–२ मै उम्मेदवार बनाउने निर्णय गरेको हो।
यसैबीच, आज बसेको रुपन्देही–२ क्षेत्रीय कमिटीको विशेष बैठकले जसरी पनि विष्णु पौडेललाई उक्त क्षेत्रबाट उम्मेदवार बनाउने र जिताउने सम्पूर्ण जिम्मेवारी आफूहरूले लिने निर्णय गरेको जनाएको छ।
बिष्णु पौडेल रुपन्देही–२ बाट चुनाव लड्न निश्चित भएपछि रुपन्देहीका पाँचै क्षेत्रका उम्मेदवार निश्चित भएको छ। रुपन्देही–१ दधिराम न्यौपाने, रुपन्देही–२ विष्णुप्रसाद पाडैल, रुपन्देही–३ बाट बासुदेव घिमिरे, रुपन्देही–४ बाट सुनिता थथेर र रुपन्देही–५ बाट खिमलाल भट्टराई उम्मेदवार टुंगिएको हो।
