काबुल। संयुक्त राष्ट्रसङ्घले यस वर्ष लाखौँ तीव्र कुपोषणको शिकार हुने चेतावनी दिएपछि अफगानिस्तानको तालिवान सरकारले शनिबार आफ्नो लक्ष्य ‘सबै कुपोषित बालबालिका र आमालाई सहयोग गर्ने’ रहेको बताएको छ ।
विश्व खाद्य कार्यक्रमका निर्देशक जोन आइलिफले यसै हप्ता एएफपीसँग भन्नुभयो, “४० करोड जनसङ्ख्या भएको अफगानिस्तानमा ५० लाख महिला र बालबालिका जीवनलाई नै जोखिममा पार्ने कुपोषणको सामना गर्नुपर्नेछ।”
संयुक्त राष्ट्रसङ्घको खाद्य सुरक्षा निकायले करिब ४० लाख बालबालिकालाई कुपोषणको उपचार गर्नुपर्ने बताएको छ, जुन तथ्याङ्कलाई संयुक्त राष्ट्रसङ्घले अनिवार्य गरेको एकीकृत खाद्य सुरक्षा चरण वर्गीकरणले पनि पुष्टि गरेको छ।
“यी सङ्ख्याहरू आश्चर्यजनक छन्,” आइलिफले भन्नुभयो ।
अफगानिस्तानको जनस्वास्थ्य मन्त्रालयले भने शनिबार एक फरक र कम कुपोषणको तथ्याङ्क दिँदै त्यहाँ करिब तीस लाख बालबालिका र आमाहरू कुपोषणबाट पीडित रहेको बताएको छ।
मन्त्रालयका प्रवक्ता शराफत जमानले एएफपीलाई भने, “करिब १३ लाख बालबालिका मध्यम कुपोषणका सिकार छन्, सात लाख तीव्र कुपोषणबाट पीडित छन् र नौ लाख आमाहरू मध्यमदेखि गम्भीर रूपमा कुपोषित छन् ।”
कुपोषणको उपचार गर्ने सुविधा ८०० बाट बढेर तीन हजार २०० पुगेको मन्त्रालयले जनाएको छ । “हाम्रो लक्ष्य सबै बिरामीहरूमा पुग्नु हो र सबै कुपोषित महिला र बच्चाहरूलाई सरकारले मद्दत गर्छ,” जमानले भन्नुभयो।
आन्तरिक रूपमा उत्पादन गर्न अफगानिस्तानको प्रयासलाई पनि प्रकाश पार्दै उहाँले भन्नुभयो, “हामीले अन्तर्राष्ट्रिय सङ्गठनहरूको सहयोगमा औषधि, खाद्यान्न र सहयोग वितरण गर्नुपर्छ।”
डब्ल्यूएफपीले आगामी छ महिनामा ६० लाख अफगानीहरूलाई खुवाउन तत्काल खद्यान्न सहयोगका लागि अपिल गर्न ३९ करोड डलर माग गरिरहेको छ । यद्यपि, एलिफले हालैका वर्षहरूमा सहायता दान कटौती भएपछि रकम प्राप्त गर्ने सम्भावना ‘न्यून’ रहेको बताउनुभएको छ।(रासस/एएफपी)
