काठमाडौं: निर्वाचन आयोगले नेपाली कांग्रेसको आधिकारिकता गगन थापा समूहलाई दिएको निर्णयको विरुद्ध कांग्रेसको देउवा समूह सर्वाेच्च अदालत जाने भएको छ । देउवा समूहका एकजना नेताले बताए अनुसार सो समूह उक्त निर्णयप्रति असहमति जनाउँदै आइतबार नै अदालत जाने भएको हो ।
आज साँझ केही बेर अघि यस विषयमा निर्णय भएको र भोलि शनिबार रिट लेखेर तयार गरी आइतबार नै अदालत जाने तयारी भएको ती नेताले जानकारी दिए ।
यसअघि आजै सो समूहका कार्यबाहक सभापति पूर्णबहादुर खड्काले आयोगको सो निर्णय दुर्भाग्यपूर्ण रहेको बताएका थिए । केही बेरअघि निर्वाचन आयोगले थापा समूह नेपाली कांग्रेसको आधिकारिक रहेको निर्णय सुनाएको थियो ।
तर सो निर्णय आफूहरुलाई मान्य नरहेको खड्काले बताएका थिए । उनले आयोगको सो निर्णय प्रतिशोधपूर्ण र गैरकानुनी रहेको पनि बताएका थिए ।
आज दिनभर देउवा पक्ष र गगन पक्षका समर्थक र कार्यकर्ताले निर्वाचन आयोग अघिल्तिर सडकमा धर्ना र जुलुश गरेका थिए ।
