काठमाडौँ: नेपाली कांग्रेसको केन्द्रीय समितिको बैठक भोलि बिहान सम्मका लागि स्थगित भएको छ । बिहान ८ बजे बस्ने गरी बैठक स्थगित भएको हो ।
सानेपामा अघि साँझ बसेको बैठक केही बेरमै भोलि बस्ने गरी स्थगित गरिएको थियो । बैठकको अध्यक्षता गरिरहेका कांग्रेसका कार्यबाहक सभापति पूर्णबहादुर खड्का अकस्मात बाहिरिएपछि अध्यक्षता धनराज गुरुङले गरेका थिए ।
उनले नै भोलि बिहान बस्नेगरी बैठक आह्वान गरेका हुन् । आजको बैठकमा पार्टीको विशेष महाधिवेशन पक्षधरका महामन्त्रीद्वय गगनकुमार थापा, विश्वप्रकाश शर्मासहितका केन्द्रीय सदस्यहरु पनि गएका थिएनन् ।
सो बैठक महामन्त्रीद्धयलाई पार्टीबाट निष्कासन गर्नका लागि आह्वान गरिएको भनिएपछि यता विशेष महाधिवेशनस्थल भृकुटीमण्डपमा जम्मा भएका महाधिवेशन प्रतिनिधिहरुले भने चाँडै निर्वाचन गरेर पार्टी सभापति चयन गर्न भन्दै दबाब दिएका थिए ।
आइतबारदेखि भृकुटीमण्डपमा सुरु भएको विशेष महाधिवेशनमा बहुमत प्रतिनिधिहरूको सहभागिता रहेको आयोजकको दाबी छ । बन्दसत्रले कार्यविधिसँगै महामन्त्रीद्वयको प्रस्तावहरू पारित गरेको छ भने पुरानो निर्वाचन समिति भंग गरी नयाँ निर्वाचन समितिले काम थालेको छ ।
यसरी निर्वाचन गर्दा पुरानो केन्द्रीय कार्य समिति भंग हुने र नयाँ निर्माण हुने प्रावधान छ । यसो गर्दा सभापति शेरबहादुर देउवा र संस्थापन पक्षका धेरै नेताहरु बाहिर पर्ने निश्चित छ ।
त्यसैले वार्ताबाट मिलाउने भन्दै आज दिउँसो बसेको संस्थापन र विशेष महाधिवेशन पक्षका वार्ता समितिबीच भएको वार्ता निष्कर्षमा पुग्न सकेन । सो वार्तामा सभापतिबाट शेरबहादुर देउवाले राजीनामा दिनुपर्ने अडान विशेष महाधिवेशन पक्षधरका सदस्यले राखेपछि वार्ता विना निष्कर्ष टुंगिएको थियो ।
वार्तामा रहेका एकजना सदस्यका अनुसार कुरा मिल्न मुस्किल देखिएको छ । पार्टी सभापति देउवा राजीनामा दिने पक्षमा नरहेका र यता विशेष महाधिवेशन पक्षले यसैलाई वार्ताको बटम लाइन बनाएकाले सहमतिको सम्भावना निकै झिनो रहेको ती सदस्यले जनाए ।
यसकारण पार्टी अब अब लगभग विभाजनको संघारमा पुगेको उनको भनाई छ । महामन्त्रीद्वय गगन थापा र विश्वप्रकाश शर्माको समर्थन रहेको विशेष महाधिवेशनको तेस्रो दिन नयाँ नेतृत्व चयनका लागि मनोनयन दर्ता सुरु भइ सकेको छ ।
धेरै महाधिवेशन प्रतिनिधिहरुले यसै विशेष महाधिवेशनबाटै नयाँ नेतृत्व चयन गर्नुपर्ने भन्दै नाराबाजी र दबाब सिर्जना गरेका छन् । यसकारण पनि सहमतिको सम्भावना क्षीण बन्दै गएको हो ।
उता संस्थापन पक्ष भने पछिल्लो समय निकै लचिलो भएको छ । विशेष महाधिवेशनलाई अपनत्व लिने विषयमा सभापति देउवा र संस्थापन पक्षीय धेरै नेता सहमत भए पछि फेरि वार्ताका सदस्यहरुले सभापतिको राजीनामाको माग नै अघि सारेका छन् ।
सहमतिका लागि दिनभरी जसो द्धिपक्षीय एवं त्रिपक्षीय छलफल जारी छ । तर पनि कुरा मिल्न सकेको छैन । यता साँझतिर विशेष महाधिवेशनको हलभन्दा बाहिरबाट हुने निर्णय नमान्ने भन्दै प्रतिनिधिहरुले होहल्ला गर्न थालेका छन् ।
यसैबीच आज राति पनि वार्ता गर्ने दुवै पक्षले जनाएका छन् । तर संस्थापन पक्ष भने वार्तामा बस्न तयार भए पनि सभापतिको राजीनामालाई बटम लाइन बनाएर कुनै निकास ननिस्कने बताइरहेको छ । त्यसैले रातिको वार्ताबाट पनि निकास निस्कन मुस्किल रहेको देखिएको छ ।
