काठमाडौं: नेपाली कांग्रेस भित्र चुलिएको विवाद साम्य बनाउन आज बिहानैदेखि लाजिम्पाटमा त्रिपक्षीय वार्ता सुरु भएको छ ।
वार्तामा पार्टी सभापति शेरबहादुर देउवा पक्षबाट केन्द्रीय सदस्य रमेश लेखक, बालकृष्ण खाण, नेता डा शेखर कोइराला पक्षबाट सहमहामन्त्री जीवन परियार, केन्द्रीय सदस्य डा मिनेन्द्र रिजाल, महामन्त्री गगन थापा र विश्व प्रकाश शर्मा पक्षबाट केन्द्रीय सदस्य प्रदीप पौडेल र मधु आचार्य, विशेष महाधिवेशनका अभियन्ता गुरुराज घिमिरे र देवराज चालिसे सहभागी छन् ।
विशेष महाधिवेशनको बन्द सत्र जारी रहेकै बेला वार्ता प्रक्रिया सुरु भएको हो । संस्थापन पक्षले आजै केन्द्रीय समिति बैठक डाकेको छ, तर गगन थापा पक्षले उक्त बैठकमा सहभागी नहुने बताइसकेको छ ।
गगन र विश्व टिमले हिजै राति वार्ता प्रक्रियालाई अघि बढाउने र आफूहरु हदैसम्म लचिलो हुन तयार रहेको सन्देश दिएको थियो । आगामी प्रतिनिधिसभाको निर्वाचनमा टिकट बाँड्दा सभापति देउवाको हस्ताक्षर कुनै हालतमा स्वीकार नगर्ने सर्त गगन र विश्व टिमले अघि सारे पनि अन्य विषयमा लजकता अपनाउन राजि भएका थिए ।
कांग्रेसको केन्द्रीय कार्यसमितिले पार्टीको पन्ध्रौँ महाधिवेशन आगामी वैशाखमा गर्ने कार्यसूची बहुमतबाट पारित गरे पनि त्यसमा असहमति जनाएका महामन्त्रीद्वय थापा र शर्माको अगुवाइमा पुस २७ देखि भृकुटीमण्डपमा विशेष महाधिवेशन जारी छ।
