काठमाडौँ । नेपाली काँग्रेस नेता एवं पूर्वअर्थमन्त्री महेश आचार्यले पार्टी विशेष महाधिवेशन पक्षको विजय भएको टिप्पणी गर्नुभएको छ ।
देशभरका महाधिवेशन प्रतिनिधिहरु विशेष महाधिवेशनमा आएकाले विशेष महाधिवेशन पक्षधर नै नेपाली काँग्रेस हो भन्ने पुष्टि भएको जिकिर गर्नुभएको हो । उहाँले पार्टीको संस्थापन पक्षलाई पुल र विशेष महाधिवेशन पक्षधरलाई नदीको रुपमा चित्रण गर्दै नदी र पुल अलग भएर बस्नै नसक्ने तर्क समेत गर्नुभयो । काठमाडौंमा सुरु भएको पार्टीको विशेष महाधिवेशनमा बोल्दै नेता आचार्यले विशेष महाधिवेशनको भावनालाई पार्टीका कुनैपनि पदाधिकारीले लत्याउने चेष्टा गर्न नमिल्ने बताउनु भयो ।
उहाँले भन्नुभयो, ‘यो उपस्थितिले विधान अनुसार पार्टी चल्नुपर्छ भन्नेहरुको जय भएको छ । आज विधिलाई स्थापना गर्नका निम्ति तपाईहरुको उपस्थिति सकारात्मक कारक बनेको छ । अव भोलीबाट नेपाली काँग्रेस हिजोको जस्तो, आजको जस्तो मात्रै काँग्रेस रहने छैन । बहुमत प्रतिनिधि साथीहरुको भावनालाई कुनैपनि पार्टीको पदाधिकारीले लत्याउने चेष्टा फेरि गर्नेछैन । एउटा विधिको स्थापना हुनेछ । बहुमत महाधिवेशन प्रतिनिधि जहाँ छन, त्यही हुन्छ पार्टी । पार्टीको नेता पुल एकातिर लिएर उभिने अनि मेची महाकालीका प्रतिनिधिहरु नदीको रुपमा एकातिर उभिने । नदी एकातिर, पुल अर्कोतिर हुन सक्दैन । ’
काँग्रेस नेता आचार्यले मुलुकलाई अघि बढाउने कार्यभारसहित अघि बढ्न पनि युवा नेताहरुलाई आग्रह गर्नुभयो ।
