काठमाडौँ । राष्ट्रिय मानवअधिकार आयोगका अध्यक्ष तपबहादुर मगरले खाद्य उत्पादनमा देशलाई आत्मनिर्भर बनाउनुपर्ने बताउनुभएको छ ।
आयोगले बिहीवार आयोजना गरेको खाद्य अधिकार तथा खाद्य सम्प्रभुता सम्बन्धी ऐन, २०७५ को कार्यन्वयन अवस्था र पुनरावलोकन विषयक छलफलमा उहाँले यस्तो बताउनुभएको हो ।
संविधानले प्रदान गरेको सबै नागरिकको खाद्य अधिकारलाई पूरा गर्न नेपालमा उत्पादन बढाउनेगरी निति बनाउनुपर्नेमा उहाँले जोड दिनुभएको हो । हाल आयातमार्फत भएपनि नेपालमा खाद्य अभाव नभएको उहाँले बताउनु भयो । तर यसलाई सुधार गरेर खाद्यमा नेपाल नै आत्मनिर्भर हुनेगरी उत्पादन बढाउन लाग्नुपर्नेमा उहाँले जोड दिनुभयो । उहाँले खाद्य अधिकार तथा खाद्य सम्प्रभुता सम्बन्धी ऐनको व्यवस्था र मर्म पनि पनि त्यही नै रहेको दाबी गर्नुभयो । उहाँले खाद्यमा विषादी हुनेगरेको उल्लेख गर्नुहुँदै सम्बन्धित निकायले त्यसलाई निगरानीमा राख्नुपर्ने बताउनु भयो । स्वच्छ खानेकुरा खान पाउनु नागरिकको अधिकार भएको उहाँको भनाई छ ।
उहाँले भन्नुभयो, ‘ऐन कार्यन्वयन हुने र सबैको खाद्य अधिकार संविधानले प्रदान गरेको अधिकार प्रयोग गर्न पाउनुपर्छ । हामी कहाँ फुड सटेज छैन अहिले तथापि हामीले धान चामल बाहिर निकासी गथौ, अहिले बाहिरबाट आयात गरिहेका छौँ । तर यसलाई सुधार गरेर हामीले खाद्यको अवस्था जुन हो, हामीले हामै देशमा पुग्ने बनाउनुपर्छ । त्यस्तो नितिको व्यवस्था गरेर जानुपर्छ । यो ऐनको व्यवस्था पनि त्यही नै हो । खाद्यमा विषादी पनि हुनुभएन, त्यसलाई पनि निगरानी राख्नुप¥यो । स्वच्छ खानेकुरा खान पाउनुपर्छ ।’
उहाँले खाद्य सुरक्षासम्बन्धी आयोगले सरकारलाई दिएको सुझाव कार्यान्वयनमा नआएको पनि गुनासो गर्नुभयो । आयोगले दिएको सुझावलाई कार्यान्वयनमा ल्याउन उहाँले सरकारलाई आग्रह गर्नुभयो ।
