काठमाडौँ । नेपाली कम्युनिस्ट पार्टी (नेकपा)का युवा नेता तथा मधेस प्रदेश सभा सदस्य रहबर अन्सारीले पार्टी सदस्यताबाट राजीनामा दिएका छन्। उनले बिहीबार हुलाकमार्फत नेकपाका संयोजक पुष्पकमल दाहाल ‘प्रचण्ड’लाई सम्बोधन गर्दै राजीनामा पत्र पठाएका हुन्।
राजीनामा पत्रमा अन्सारीले नेकपा (माओवादी केन्द्र)ले अन्य दलसँग एकीकरणपछि आफ्नो मूल चरित्र गुमाएको आरोप लगाएका छन्। पार्टीले साहस, इमान र जोखिम लिन सक्ने क्षमता त्यागिसकेको भन्दै आफू यस्तो विरोधाभासको हिस्सा बन्न नसक्ने उनको भनाइ छ।
‘साहस, इमान र जोखिम—यी तीनै कुरा पार्टीले त्यागिसकेको छ। म यो विरोधाभासको हिस्सा बन्न सक्दिन,’ अन्सारीले राजीनामा पत्रमा उल्लेख गरेका छन्, ‘यसै बोधका साथ म पार्टी सदस्यताबाट समाजवादी क्रान्ति जिन्दावाद भन्दै बिदा लिन्छु।’
अन्सारी नेकपा (माओवादी केन्द्र)बाट निर्वाचित मधेस प्रदेश सभा सदस्य हुन्।
