काठमाडौं: जेनजी आन्दोलनका क्रममा भएको जनधनको क्षतिबारे अनुसन्धान गर्न गौरीबहादुर कार्कीको अध्यक्षतामा गठन भएको आयोगसँग तत्कालीन प्रधानमन्त्री एवं एमालेका अध्यक्ष केपी शर्मा ओलीले निवासमै पुगेर बयान नोट लिएको थियो । तर त्यस नोटमा ओलीका तर्फबाट के जवाफ दिइयो भन्ने सम्बन्धमा पूर्ण विवरण सार्वजनिक भइसकेको छैन ।
यहीबीच अध्यक्ष ओलीका निकट केन्द्रीय नेता महेश बस्नेतले आज सामाजिक संजालबाट ओलीले बयानमा दिएका मुख्य मुख्य बुँदाहरु सार्वजनिक गरेका छन् ।
बयानमा ओलीले भदौ २२ गते बेलुका राष्ट्रिय सुरक्षा परिषद्को बैठकमा आन्दोलन शान्तिपूर्ण हुने, बल प्रयोग नगर्ने र युवा–विद्यार्थीलाई सहयोग गर्ने विषयमा छलफल भएको बताउनु भएको छ ।
यस्तै ओलीले आन्दोलन गर्ने अधिकांश व्यक्ति जेन–जी पुस्ताका नभएको कुरा तत्कालीन फोटो र भिडियोहरूले प्रस्ट देखाएको र आन्दोलनमा एक्कासी गोली चलाइएको बताउनु भएको छ ।
भदौ २४ गतेको अवस्था नियन्त्रणमा लिन नेपाली सेना परिचालन गर्न चाहिएको भए पनि त्यो सम्भव हुन नसकेको पनि ओलीले जवाफ दिनु भएको छ ।
जवाफका मुख्य बुँदाहरु
नेकपा एमालेका अध्यक्ष तथा तत्कालीन प्रधानमन्त्री केपी शर्मा ओलीले दिनुभएको जवाफका मुख्य बुँदाहरू
-२२ भदौको बेलुका राष्ट्रिय सुरक्षा परिषद्को बैठकमा आन्दोलन शान्तिपूर्ण हुने, बल प्रयोग नगर्ने र युवा–विद्यार्थीलाई सहयोग गर्ने विषयमा छलफल भएको।
-आन्दोलनमा घुसपैठ र अराजक समूह प्रवेश भएको कुरा आन्दोलनमा संलग्न युवाहरूले नै स्वीकार गरिसकेका।
-आन्दोलन गर्ने अधिकांश व्यक्ति जेन–जी पुस्ताका नभएको कुरा तत्कालीन फोटो र भिडियोहरूले प्रस्ट देखाएको।
-२३ भदौमा तोडफोड र एक्कासि गोली प्रहार सुरु भएपछि गृहमन्त्रीसहित सबै सुरक्षा प्रमुखसँग छलफल गरी छानबिन समिति गठन गर्ने निर्णय।
-२४ भदौको अवस्था नियन्त्रणमा लिन नेपाली सेना परिचालन गर्न चाहिएको भए पनि त्यो सम्भव हुन नसकेको।
-गौरीबहादुर कार्कीले घटनाकै दिन र त्यसअघि–पछिसमेत सामाजिक सञ्जालमा धारणा सार्वजनिक गरिसकेकाले निष्पक्ष प्रतिवेदन आउनेमा आशंका।
-महेश बस्नेतको वालबाट साभार
