काठमाडौँ । भाद्र २३ र २४ गते भएका घटनासँग सम्बन्धित जाँचबुझका लागि गठित आयोगले पूर्वप्रधानमन्त्री केपी शर्मा ओलीको स्थान हद फुकुवा गरेको छ।
आयोगको सचिवालयले जारी गरेको सूचनामा ओलीलाई विदेश भ्रमण गर्न तथा काठमाडौँ उपत्यका बाहिर जान नपाउने गरी लगाइएको पूर्व निर्णय हटाइएको जानकारी दिइएको हो।
यसअघि अनुसन्धानको सिलसिलामा आयोगले असोज १२ गते ओलीलाई आयोगको अनुमति बिना उपत्यका बाहिर तथा विदेश भ्रमणमा जान रोक लगाएको थियो।
आयोगका अनुसार घटनाको छानबिनका क्रममा आवश्यक कार्य सम्पन्न भइसकेकाले उक्त प्रतिबन्ध हटाउने निर्णय गरिएको हो।
यस निर्णयको बोधार्थ प्रधानमन्त्री तथा मन्त्रिपरिषद्को कार्यालय, परराष्ट्र मन्त्रालय, नेपाल प्रहरी प्रधान कार्यालय तथा सम्बन्धित व्यक्ति ओलीलाई पठाइएको आयोगले जनाएको छ।
