काठमाडौँ । राष्ट्रिय स्वतन्त्र पार्टी (रास्वपा)ले सोमबार पार्टी एकीकरणलाई औपचारिकता दिँदै समायोजन सभा गर्ने भएको छ । यस सभालाई सो पार्टीले राजनीतिक समायोजन घोषणा सभाको नाम दिएको छ ।
यसअघि पनि बालेन साह र कुलमान घिसिङको उज्यालो नेपाल पार्टी रास्वपामा समायोजना भए पनि औपचारिक रुपमा सभा गरेर घोषणा नगरिएकाले आजको सभा राखिएको सो पार्टीले जनाएको छ । साथै नागरिक उन्मुक्ति पार्टीका पूर्वनेतृत्वहरू, थरुहट-थारुवान अभियान्ताहरू र रास्वपाबीच पार्टी समायोजन गर्ने पनि तय भएको छ ।
दिउँसो १ बजे राष्ट्रिय सभागृहमाा आयोजना हुने सो घोषणा सभामा यी सबै पक्षको समायोजनका बारेमा औपचारिक रुपमा जानकारी गराइने भएको हो ।
हालै मात्र राजीनामा दिएका रञ्जिता श्रेष्ठ नेतृत्वको नागरिक उन्मुक्ति पार्टी (नाउपा) रुपन्देहीका जिल्ला अध्यक्षसहित ३३ जना पनि आज रास्वपामा समाजोजन हुनेछन् । रञ्जिता नेपाली कम्युनिस्ट पार्टीमा प्रवेश गरेपछि असन्तुष्ट नेता–कार्यकर्ताले रास्वपा रोजेका हुन् ।
उता आजै नेपाली कांग्रेस केन्द्रीय कार्यसम्पादन समितिको बैठक पनि बस्ने भएको छ । पार्टी केन्द्रीय कार्यालय सानेपामा दिउँसो १ बजे बस्ने बैठकमा कांग्रेसको पछिल्लो विवादका बारेमा छलफल र निर्णय हुने भएको छ । सो बैठकमा पार्टीको १५औँ महाधिवेशन, आसन्न राष्ट्रियसभा र प्रतिनिधिसभा सदस्य निर्वाचनलगायत समसामयिक विषयमा छलफल हुने पार्टी कार्यालयका मुख्यसचिव कृष्णप्रसाद पौडेलले जानकारी दिए ।
गत शुक्रबार मात्र कार्यसम्पादन समितिको बैठक बसेर पार्टीको १५औँ महाधिवेशन आगामी वैशाख २८ देखि ३१ गतेसम्म काठमाडौँमा गर्ने निर्णय गरेको थियो । तर पनि त्यसमा विशेष महाधिवेशनको माग गरिरहेको महामन्त्रीद्धय गगन थापा र विश्वप्रकाश शर्मा समूह सहमत भएकाो छैन ।
सो समूहले यही पुस २६ देखि नै विशेष महाधिवेशनको आह्यान गरिसकेको छ । कांग्रेस केन्द्रीय कार्यालयमा गत असोज २९ गते ५४ प्रतिशत महाधिवेशन प्रतिनिधिले दर्ता गराएको विशेष महाधिवेशनको प्रस्ताव विचाराधीन अवस्थामा रहेकाले त्यसलाई मान्यता दिँदै महामन्त्रीद्धय समूहले विशेष महाधिवेशनको आह्वान गरेका छन् ।
कांग्रेसमा विवाद चर्किँदै गएपछि फुट्को संघारमा पुगेको बताइएको छ । आजको कार्य सम्पादन समितिको बैठकले यी दुवै पक्षलाई मिलाएर निकास निकाल्नेगरी निर्णय गर्ने अपेक्षा गरिएको छ ।
