काठमाडौं: इङलिस प्रिमियर लिग अन्तर्गत बिहीबार राति भएको खेलमा लिगको शीर्ष स्थानका लागि प्रतिस्पर्धा गरिरहेको म्यान्चेस्टर सिटी सन्डरल्यान्डसँग बराबरीमा रोकिएको छ ।
स्टेडियम अफ लाइट रंगशालामा भएको यस बराबरीसँगै सिटी र पहिलो स्थानको आर्सनल बिचको अंक दुरी ४ पुगेको छ । समान १९ खेल खेलेका दुबै टिमको लिगमा अहिले आर्सनलको ४५ अंक छ भने सिटीको ४१ अंक छ ।
एक पक्षीय पूरै खेल अवधिमा झण्डै ६८ प्रतिशत हिस्सा सिटीको पक्षमा रहे पनि गोल भएको थिएन । सिटीले एकपछि अर्को अवसर सिर्जना गरेपनि सन्डरल्यान्डका गोलरक्षकले उत्कृष्ट बचाउ गरेका थिए भने सन्डरल्यान्डका डिफेन्डरले पनि सिटीका अनेक आक्रमणलाई निस्तेज बनाएका थिए ।
यस सिजन सन्डरल्यान्डले पनि राम्रो प्रदर्शन गरिरहेको छ । यस टिमले १९ खेलबाट २९ अंक जोडेर सातौं स्थानमा आफूलाई उभ्याउन सफल भएको छ । गत डिसेम्बरमा एतिहाद रंगशालामा भएको खेलमा सिटीले सन्डरल्यान्डलाई ३–१ गोल अन्तरले पराजित गरेको थियो ।
खेल पछि प्रतिक्रिया दिँदै सिटीका म्यानेजर पेप गार्डिओलाले आफ्नो टिमले सुन्दर खेल प्रदर्शन गरी निरन्तर दबाबमा राखेपनि गोल हुन नसकेकामा आश्चर्य लागेको बताएका थिए । उनले सन्डरल्यान्डले पनि राम्रो खेल प्रदर्शन गरेकामा बधाई दिए ।
