काठमाडौँ । नेकपा एमालेका नेता गोकुल बाँस्कोटाले पटक–पटक समानुपातिक प्रणालीमार्फत संसद् पुग्न रुचाउने नेताहरूलाई लक्षित गर्दै कटाक्ष गरेका छन्।
कांग्रेस–एमाले मिलेर चुनाव लड्नुपर्ने बहस चलिरहेका बेला समेत चुनाव सामना गर्न डर देखिनु अनुचित भएको उनको टिप्पणी छ।
बाँस्कोटाले आज बिहान सामाजिक सञ्जालमा लेख्दै भनेका छन्, “समानुपातिक कोटामा आफूलाई शक्तिशाली र लोकप्रिय ठान्ने नेता नै पटक–पटक बसेपछि यो प्रणालीको विरोध हुनु ठिक हो। अझ तिनैले रुख र सूर्य मिलेर चुनावमा जानु पर्छ भन्छन्। रुख–सूर्य मिलेपछि चुनाव लडे भो त। अहिले नाम फिर्ता लिए हुन्छ पटके समानुपातिकले।”
उनले आफूलाई शक्तिशाली र लोकप्रिय दाबी गर्ने नेताहरू पटक–पटक समानुपातिक सूचीबाट संसद् पुगेको कारण समावेशीताकै बेइज्जत भएको उल्लेख गरेका छन्। यसमा पुरुष नेताहरूको संख्या अझ बढी देखिएको उनको आरोप छ।
यसैबीच, एमालेले बुझाएको समानुपातिकको बन्दसूचीमा पार्टीका पदाधिकारीमध्ये उपाध्यक्ष रामबहादुर थापा बादलको नाम समावेश भएपछि पार्टीभित्रै असन्तुष्टि देखिएको छ।
