काठमाडौं: रुसी राष्ट्रपति भ्लादिमिर पुटिनले आफ्नो सरकारी निवासमा युक्रेनले ड्रोन हमला गरेको भन्दै अमेरिकी राष्ट्रपति डोनाल्ड ट्रम्पसँग टेलिफोन वार्ता गरेका छन् ।
क्रेमलिनको हवाला दिँदै रुसको तास न्यूजले जनाए अनुसार, पुटिनले नोभगोरोड क्षेत्रस्थित आफ्नो सरकारी निवासमा किभले आतंकवादी हमला गरेको भन्दै अमेरिकी समकक्षीलाई ध्यानाकर्षण गराएका थिए । ड्रोन हमलाबारे जानकारी पाएपछि राष्ट्रपति ट्रम्पले आफू स्तब्ध भएको प्रतिक्रिया दिएको पनि तासले जनाएको छ ।
दुवै राष्ट्रपतिबीच फ्लोरिडामा सम्पन्न अमेरिका–युक्रेन वार्ताबारे पनि छलफल भएको थियो । उनीहरूले आगामी दिनमा पनि मित्रवत संवादलाई निरन्तरता दिने सहमति गरेको क्रेमलिनले जनाएको छ।
यता, युक्रेनी राष्ट्रपति भोलोदिमिर जेलेन्स्कीले रुसले लगाएको आरोप अस्वीकार गर्दै युक्रेनले राष्ट्रपति भ्लादिमिर पुटिनका आवासमध्ये एकमा ड्रोन आक्रमण गरेको भन्ने दाबीलाई खण्डन गरेका छन् । साथै, उनले मस्को शान्ति वार्ता बिथोल्ने प्रयासमा लागेको आरोप लगाएका छन्।
रुसका विदेशमन्त्री सर्गेई लाभरोभले किभले गएराति ९१ वटा लामो दूरीका मानवरहित हवाई यान (ड्रोन) प्रयोग गरी रुसको उत्तरपश्चिमी नोभगोरोड क्षेत्रमा रहेको पुटिनको सरकारी निवासमा आक्रमण गरेको दाबी गरेका थिए ।
तर ती सबै ड्रोनलाई रुसी वायु रक्षा प्रणालीले हावामै नष्ट गरेको बताएका छन् । उक्त आक्रमणका कारण कुनै मानवीय क्षति वा भौतिक क्षतिको विवरण प्राप्त भएको छैन।
रुसले यस घटनापछि शान्ति वार्तामा आफ्नो धारणा पुनरावलोकन गर्ने जनाएको छ । उक्त कथित आक्रमणको समयमा राष्ट्रपति पुटिन कहाँ थिए भन्ने कुरा स्पष्ट भइसकेको छैन ।
तर राष्ट्रपति जेलेन्स्कीले उक्त दाबीलाई “रुसी झुटहरू” भन्दै खारेज गरेका छन्। उनका अनुसार, यस्ता आरोपहरू क्रेमलिनले युक्रेनमाथि आक्रमण जारी राख्न बहाना बनाउन प्रयोग गरिरहेको छ।
