काठमाडौँ । फिफा अध्यक्ष जियानी इन्फेन्टिनोले आगामी समरमा आयोजना हुने विश्वकप फुटबलका टिकटको मूल्य महँगो हुनु जनसाधारणको “अत्यन्तै पागलपनजस्तै” मागका कारण भएको दाबी गरेका छन्।
संयुक्त राज्य अमेरिका, क्यानडा र मेक्सिकोमा आयोजना हुने प्रतियोगिताको टिकट मूल्य संरचनालाई लिएर व्यापक आलोचना भइरहेको छ। फुटबल समर्थकहरूको संस्था ‘फुटबल सपोर्टर्स एसोसिएसन’ (एफएसए) ले यसलाई “लाजमर्दो” भनेको छ।
समूह चरणका खेलका टिकट २०२२ को कतार विश्वकपको तुलनामा तीन गुणासम्म महँगो छन्। न्यू जर्सीमा हुने फाइनल खेलको सबैभन्दा सस्तो टिकटको मूल्य नै ३ हजार ११९ पाउन्ड पुगेको छ।
तर इन्फेन्टिनोले माग आपूर्तिभन्दा धेरै बढी भएको बताएका छन्। सोमबार दुबईमा आयोजित वर्ल्ड स्पोर्ट्स समिटमा बोल्दै उनले भने, “हामीसँग ६ देखि ७ मिलियन टिकट बिक्रीमा छन्, तर १५ दिनमै १५० मिलियन टिकटका लागि अनुरोध प्राप्त भयो। यसले विश्वकप कति शक्तिशाली छ भन्ने देखाउँछ।”
उनका अनुसार, “विश्वकपको करिब १०० वर्षे इतिहासमा फिफाले कुल ४४ मिलियन टिकट मात्र बिक्री गरेको छ। तर दुई हप्तामै हामीले ३०० वर्षका विश्वकप भरिने बराबरको माग पाएका छौँ। यो साँच्चै पागलपन हो।”
टिकट मूल्यको आलोचना भएपछि फिफाले सबै १०४ खेलका लागि ४५ पाउन्ड मूल्यका ‘अझ किफायती’ टिकटको सानो संख्यामा व्यवस्था गरेको छ। छलफलसँग नजिक रहेका एक फिफा अधिकारीले बीबीसीलाई भने, “हामीले प्रतिक्रियालाई सुनेका छौँ र नयाँ श्रेणीको टिकट सही कदम हो।”
इन्फेन्टिनोले टिकट बिक्रीबाट उठेको रकम विश्वभरको फुटबल विकासमा पुनः लगानी गरिने बताए, यद्यपि कति रकम भन्ने स्पष्ट पारेनन्। उनले भने, “यहाँबाट उठ्ने आम्दानी विश्वभरको खेलमै फर्काइन्छ। फिफा नहुँदो हो त संसारका १५० देशमा फुटबल नै हुने थिएन। विश्वकपबाट उत्पन्न आम्दानीकै कारण विश्वभर फुटबल सम्भव भएको हो।”
फिफाका अनुसार, यही आम्दानीमार्फत विश्वव्यापी फुटबल संरचना, विकास कार्यक्रम र प्रतियोगितामा लगानी गरिँदै आएको छ।
