काठमाडौं । निर्वाचन नजिकिँदै गर्दा दलहरु एक आपसमा गाभिने क्रम तिब्र रुपमा अघि बढेको छ ।
यही सिलसिलामा नेपाली कम्युनिस्ट पार्टी र रञ्जिता श्रेष्ठ नेतृत्वको नागरिक उन्मुक्ति पार्टीबीच आज एकीकरण भएको छ । रेशम चौधरीको नेतृत्वमा रहेको नागरिक उन्मुक्ति र रञ्जिताबीच एकीकरण हुन लागेको समाचार आए पनि आज नयाँ परिस्थिति निर्माण भएको छ ।
नेकपाको केन्द्रीय कार्यालय कोटेश्वर पेरिसडाडामा भएको वार्तापछि दुबै पार्टीबीच १० बुँदे सहमति भएको छ ।
एकीकृत पार्टीको नाम नेपाली कम्युनिस्ट पार्टी रहनेछ भने चुनाव चिह्न तारा रहनेछ । सहमतिपत्रमा नेकपाका संयोजक पुष्पकमल दाहाल प्रचण्ड, सहसंयोजक माधवकुमार नेपाल र नाउपा अध्यक्ष रञ्जिता श्रेष्ठले हस्ताक्षर गरेका थिए ।
एकीकरणपछि दुवै पार्टीका तिनै तहका जनप्रतिनिधि नेपाली कम्युनिष्ट पार्टीमा समाहित हुनेछन् ।
