काठमाडौं । हिजो बालुवाटारमा प्रधानमन्त्री सुशिला कार्की र तीन प्रमुख राजनीतिक दल नेपाली कांग्रेस, नेकपा एमाले र नेपाली कम्युनिष्ट पार्टीका तीन नेताका बीचमा छलफल भई निर्वाचनमा जाने गरी भएपछि राजनीतिमा ‘आइस ब्रेक’ भएको भनिएको थियो ।
यस हिसाबले आज पनि अर्को यस्तै ‘आइस ब्रेक’ भएको भन्न सकिन्छ । आज बिहान सबेरै राष्ट्रिय स्वतन्त्र पार्टी (रास्वपा) मा काठमाडौँ महानगरपालिकाका प्रमुख बालेन साह प्रवेश गरेर सात बुँदे सहमति गरेपछि आज दिनभरका मिडिया र सामाजिक सञ्जाल भरिएका छन् ।
यी दुई ‘आइस ब्रेक’ पछि पनि निर्वाचनको वातावरण भने के कस्तो हुने हो भन्ने आशंका अझै मेटिएको छैन । हिजो मात्र पनि कांग्रेस सभापति शेरबहादुर देउवाले बालुवाटार बैठकपछि बाहिरिने क्रममा निर्वाचनमा कांग्रेस र एमाले पनि सहमागी हुने जानकारी त दिए तर पनि निर्वाचनको वातावरण बन्न नसकेको बताए ।
खासमा गत भदौको जेनजी आन्दोलनपछि पहिलो पटक आज प्रधानमन्त्री सुशिला कार्कीले तत्कालीन सत्ता साझेदार दल नेपाली कांग्रेस र नेकपा एमाले तथा तत्कालीन प्रमुख प्रतिपक्षी दल (हाल नेपाली कम्युनिष्ट पार्टीमा परिणत भैसकेको) का अध्यक्षसँग भेट र छलफल गरेकी थिइन् ।
प्रधानमन्त्रीले प्रमुख तीन राजनीतिक दलका नेताहरुसँग गरेको त्यो ‘आइस ब्रेक’ पछि आज फेरि नयाँ पार्टीको नयाँ सन्देश बाहिरिएको छ । रवि बालेन सहमतिपछि नेपाली राजनीतिमा अर्को अध्याय सुरु भएको आजका मिडियाले बताएका छन् ।
यो सहमतिमा नअटेका कुलमान घिसिङ फेरि अर्को पार्टीसँगको सहकार्यतर्फ मोडिएका छन् । उनले आफूलाई नै पार्टीको सभापति दिनुपर्ने भनी गरेको माग पूरा नभएपछि रवि बालेन सहमतिमा अट्न सेकका थिएनन् । त्यसैले उनले तत्कालीन माओवादी पार्टीबाट फुटेर बनाएको प्रगतिशील लोकतान्त्रिक पार्टीसँग कुरा चलाएका छन् ।
प्रलोपाका संयोजक रहेका जनार्दन शर्मा र कुलमानका बीच आज बिहानदेखि वार्ता जारी रहेको छ । उनीहरुले सो वार्ताको क्रमम आइतबार साँझसम्म पनि जारी रहेको छ । सम्भवत सो वार्ता मिल्ने देखिएको छ । किनभने उनी रवि बालेन समीकरणमा नअटेपछि अर्को बिकल्पका रुपमा नै प्रलोपालाई लिएका छन् ।
यी त भए पार्टीहरुका एकीकरणका कुरा । यी चुनावी मात्र हुन् या दिगो एकीकरण हुन् त्यो भने हेर्न बाँकी नै छ । यो कुराको निक्र्यौल आसन्न निर्वाचनमा ती पार्टीले प्राप्त गर्ने सिट संख्याले पनि निर्धारण गर्ने छ । किनभने प्रधानमन्त्री बन्ने भन्ने सहमति त प्रधानमन्त्री बन्ने हैसियतमा पार्टीले प्राप्त गरेको सिटमा नै भरपर्ने छ ।
तर, यहाँ उठाउन खोजिएको अर्को प्रसंग सर्वोच्च अदालतको पनि हो । जस्तो कि तत्कालीन दुई प्रमुख सत्तारुढ दल नेपाली कांग्रेस र एमालेले त संस्थागत रुपमा नै संसद पुनर्स्थापनाका लागि रिट नै हालैका छन् । र, यस विषयमा सुनुवाई पनि जारी छ । यसकारण यी दुई दलले सर्वोच्च अदालततिर हेर्न छोडेका छैनन् । त्यतातिर दुई दलको ध्यान भंग हुन सकेको छैन ।
तर, यता निर्वाचनको तयारीमा पनि उनीहरु छन् । आज र भोलि गरेर समानुपातिक निर्वाचनतर्फका उम्मेदबारको सूची पठाउँदैछन् । यसको अन्तिम तयारीमा ती दल छन् । यसकारण पनि निर्वाचन हुने तयारी भइरहेको छ । तर पनि यसका अतिरिक्त सर्वोच्च तिर उनीहरुको ध्यान छँदैछ । यसैले अब अदालततिर के होला ? अदालतले के कसरी आदेश दिन्छ भन्ने विषयमा पार्टीहरुको ध्यानप नि छ, अनि यता निर्वाचनको तयारी पनि छ ।
